„ერთიანი ნაციონალური მოძრაობის“ წევრებმა, გიორგი ბოტკოველმა და გიგი გიგიტელაშვილმა თელავში გაზეთები და 4 ოქტომბრის საპროტესტო აქციის მოსაწვევები დაარიგეს. ამის შესახებ ინფორმაციას პარტიის პრესსამსახური ავრცელებს.

მათივე ცნობით, პოლიტიკოსებმა ხალხს 4 ოქტომბერს რუსთაველის გამზირზე შეკრებისკენ კიდევ ერთხელ მოუწოდეს.

როგორც „ნაციონალური მოძრაობის“ რეგიონულმა მდივანმა, გიორგი ბოტკოველმა განაცხადა, 4 ოქტომბერს ყველა უნდა შეიკრიბოს ქვეყნის მთავარ გამზირზე და დამარცხდეს ის რეჟიმი, რომელმაც ადამიანები გააღატაკა.

„ძალიან მარტივია პასუხი კითხვაზე რატომ უნდა შევიკრიბოთ 4 ოქტომბერს. ჩვენ, „ნაციონალურ მოძრაობას“ 13 წლის განმავლობაში არცერთი ბრძოლა არ გამოგვიტოვებია, არცერთი არჩევნები, მათ შორის 2024 წლის საპარლამენტო არჩევნები, სადაც კიდევ ერთხელ ნათლად გამოჩნდა, რომ ამ ქვეყანაში ივანიშვილმა არჩევნები გააუქმა და აღარ არსებობს. ამ ყველაფრისგან გამოსავალი არის სამართლიანი ადამიანების პროტესტი, რომლებიც 4 ოქტომბერს შეიკრიბებიან. 13 წლის წინ, კახეთში ყველას კარგად გვახსოვს, ივანიშვილი ხელისუფლებაში რომ მოვიდა რა დაპირებები გასცა და რა მეთოდებით მოვიდა - ბარბარე რაფალიანცის საქმის გახსენებაც კი შეგვიძლია და შეგვიძლია ვთქვათ, რომ ივანიშვილმა არასამართლიანი მეთოდებით მოიპოვა ქვეყნის სადავეები. სწორედ ამიტომ 4 ოქტომბერს ყველა უნდა შევიკრიბოთ ქვეყნის მთავარ გამზირზე და დავამარცხოთ ის რეჟიმი, რომელმაც ადამიანები გააღატაკა, მათ დაჩაგვრას ცდილობს და ყველაფერს აკეთებს იმისთვის, რომ ამ ქვეყანას დაუკარგოს სუვერენიტეტი“, - განაცხადა ბოტკოველმა.