„ლელოშიც“ არიან წევრები, რომელთაც არ სურთ ამ ქვეყანაში არეულობა და არეულობის მცდელობაში მონაწილეობაც კი, - ასე უპასუხა პრემიერ-მინისტრმა, ირაკლი კობახიძემ კითხვას ინფორმაციაზე, რომ „ლელოს“ რამდენიმე წევრებმა პარტია დატოვა.

როგორც ირაკლი კობახიძემ ჟურნალისტებს განუცხადა, ამ პარტიაში რთული მდგომარეობაა, რაც მათ ქმედებებს და საბოტაჟს უკავშირდება.

„ზოგადად, ამ პარტიებში რთული მდგომარეობა არის. საკუთარი ქმედებებით, საბოტაჟით მათ მიიყვანეს საკუთარი პარტიები ამ მდგომარეობამდე. არათუ ადგილობრივი წარმომადგენლები, მათი ლიდერებიც კი ტოვებენ პარტიას, ამის არაერთი მაგალითი იყო, მათ შორის კონკრეტულად, „ლელოს“ და გახარიას პარტიის შემთხვევაში. ამ ფონზე, არავის უკვირს, რომ ადგილობრივი წარმომადგენლებიც ტოვებენ ამ პარტიებს, მით უმეტეს „ლელოს“ შემთხვევაში ამ პარტიამ პირდაპირ გამოუცხადა მხარდაჭერა კონსტიტუციური წყობილების ძალადობით შეცვლის და დამხობის მცდელობას, რომელიც დააანონსა მათმა მეგობარმა პარტიამ, „ნაცმოძრაობის“ ხელმძღვანელობამ. მათთან ერთად იყვნენ კონკრეტული ექსტრემისტული დაჯგუფებები. ასეთ პირობებში, „ლელოშიც“ არიან წევრები, რომელსაც არ სურთ ამ ქვეყანაში არეულობა და არეულობის მცდელობაში მონაწილეობაც კი. ეს არის აბსოლუტურად ლოგიკური პროცესი“,- განაცხადა კობახიძემ.