შსს - გუშინ კანონის დაცვის უზრუნველსაყოფად პროპორციული ზომები მივიღეთ - მომდევნო დღეებში ნებისმიერი შეკრება იქნება გუშინდელი მცდელობის გაგრძელება და მივიღებთ ზომებს, რათა საფრთხე არ შეექმნას საზოგადოებრივ წესრიგსა და უსაფრთხოებას
შინაგან საქმეთა სამინისტრო გუშინ გამართულ საპროტესტო აქციასთან დაკავშირებით განცხადებას ავრცელებს.
როგორც უწყებაში განმარტავენ, 4 ოქტომბერს მოწყობილმა შეკრებამ მალევე მიიღო კანონსაწინააღმდეგო ხასიათი, რის შემდეგაც „უმაღლესი სამართლებრივი სტანდარტის შესაბამისად კანონის დაცვის უზრუნველსაყოფად პროპორციული ზომები“ მიიღეს.
ამასთან, შსს-ის განცხადებით, გუშინ განვითარებული მოვლენებიდან გამომდინარე, მიიჩნევენ, რომ დღეს და მომდევნო დღეების განმავლობაში გამართული ნებისმიერი შეკრება იქნება გუშინდელი მცდელობის გაგრძელება და მიიღებენ შესაბამის ზომებს, „რათა საფრთხე არ შეექმნას საზოგადოებრივ წესრიგსა და უსაფრთხოებას“.
„როგორც საზოგადოებისთვის ცნობილია, გუშინ გაიმართა შეკრება, რომლის გაცხადებული მიზანი ხელისუფლების დამხობა იყო. შეკრებამ მალევე მიიღო კანონსაწინააღმდეგო ხასიათი, რის შემდეგაც საქართველოს შინაგან საქმეთა სამინისტრომ უმაღლესი სამართლებრივი სტანდარტის შესაბამისად მიიღო პროპორციული ზომები კანონის დაცვის უზრუნველსაყოფად.
საქართველოს შინაგან საქმეთა სამინისტრო დღეს და მომდევნო დღეების განმავლობაში მიიღებს შესაბამის ზომებს კანონდამრღვევების დასადგენად და მათ მიმართ კანონის აღსასრულებლად.
ამასთან, გუშინ განვითარებული მოვლენებიდან გამომდინარე, გვაქვს საფუძველი მივიჩნიოთ, რომ დღეს და მომდევნო დღეების განმავლობაში გამართული ნებისმიერი შეკრება არის გუშინდელი მცდელობის გაგრძელება და მივიღებთ შესაბამის ზომებს, რათა საფრთხე არ შეექმნას საზოგადოებრივ წესრიგსა და უსაფრთხოებას.
მოვუწოდებთ ყველას, მხედველობაში მიიღონ ეს გარემოება და თავი შეიკავონ ნებისმიერი ქმედებისგან, რომელიც მათ მიმართ სამართლებრივი ზომების მიღების საფუძველი შეიძლება გახდეს“,- ნათქვამია განცხადებაში.
