ბიზნესისა და ტექნოლოგიების უნივერსიტეტმა (BTU) ბოლონიის უნივერსიტეტის დელეგაციას უმასპინძლა, რომლის ფარგლებშიც მხარეებმა განიხილეს სამომავლო თანამშრომლობა, მათ შორის რეგიონში პირველი კვანტური კომპიუტერის შექმნა, ბიზნესის ადმინისტრირებისა და მართვის, ეკონომიკის, საინფორმაციო მეცნიერებებისა და ხელოვნური ინტელექტის მიმართულებით ერთობლივი სასწავლო პროგრამების განვითარება, ასევე კვანტური ტექნოლოგიების სფეროში ერთობლივი კვლევითი ლაბორატორიის შექმნის შესაძლებლობები.

ვიზიტი განხორციელდა იტალიის საელჩოს საქართველოში, ემილია-რომანიას რეგიონის პოპულარიზაციის პროექტის ფარგლებში, მასიმილიანო დ’ანტუონოსა და განათლების ცენტრ „მინერვას“ მხარდაჭერით. დელეგაციას, რომელსაც ბოლონიის უნივერსიტეტის რექტორი, პროფესორი ჯოვანი მოლარი ხელმძღვანელობდა, BTU-ს რექტორმა ნინო ენუქიძემ უმასპინძლა.

ვიზიტის ფარგლებში გაიმართა გაცნობითი შეხვედრები, პანელური დისკუსიები BTU-ს სტუდენტებთან, პროფესორებთან და მკვლევარებთან, აგრეთვე კამპუსის ტური, სადაც სტუმრებმა გაეცნეს უნივერსიტეტის თანამედროვე ინფრასტრუქტურასა და ლაბორატორიებს.

ბოლონიის უნივერსიტეტი (Università di Bologna), რომელიც 1088 წელს დაარსდა, მსოფლიოში უძველეს უმაღლეს საგანმანათლებლო დაწესებულებად ითვლება. უნივერსიტეტში დაახლოებით 100,000 სტუდენტი სწავლობს, ხოლო მისი კამპუსები განთავსებულია ბოლონიაში, ჩეზენაში, ფორლიში, რავენასა და რიმინიში.

ემილია-რომანია, ბოლონიის უნივერსიტეტის ხელმძღვანელობით, აღიარებულია საერთაშორისო მონაცემთა ველად (Data Valley), რეგიონად, რომელიც აერთიანებს მსოფლიო დონის სუპერკომპიუტერებს, უახლესი თაობის მონაცემთა ცენტრებთან და ძლიერი, მრავალფეროვანი დიდი მონაცემების (Big Data) ეკოსისტემის მქონე კომპანიებს.

BTU-მ და ბოლონიის უნივერსიტეტმა შეხვედრის დასრულების შემდეგ გამოთქვეს სურვილი, გააგრძელონ პარტნიორობის გაღრმავება ინოვაციური კვლევებისა და სტუდენტური გაცვლითი პროგრამების მიმართულებით.

(R)