ასე ძალიან როგორ გინდათ [უვიზო მიმოსვლის შეჩერება]? შემიძლია დაგამშვიდოთ, რომ „ქართული ოცნების“ პოლიტიკის გამო არ შეგიწყდებათ, - ამის შესახებ საგარეო საქმეთა მინისტრმა, მაკა ბოჭორიშვილმა ჟურნალისტებს განუცხადა, რითაც უპასუხა კითხვას ევროკავშირთან უვიზო მიმოსვლის სავარაუდო შეჩერებასთან დაკავშირებით.

როგორც ბოჭორიშვილმა აღნიშნა, საქართველომ უვიზო მიმოსვლა „ქართული ოცნების“ პოლიტიკის დამსახურებით მიიღო.

„ასე ძალიან როგორ გინდათ [უვიზო მიმოსვლის შეჩერება]? შემიძლია დაგამშვიდოთ, რომ „ქართული ოცნების“ პოლიტიკის გამო არ შეგიწყდებათ. „ქართული ოცნების“ პოლიტიკის დამსახურებით მივიღეთ ჩვენ უვიზო მიმოსვლა. „ქართული ოცნების“ პოლიტიკის გამო დაგარწმუნებთ, რომ თქვენ ეს საფრთხე არ გემუქრებათ“, - განაცხადა საგარეო საქმეთა მინისტრმა.

კითხვაზე, „რას აკეთებთ იმისთვის, რომ უვიზო მიმოსვლა გადაარჩინოთ?“ მინისტრმა აღნიშნა, რომ „ყველაფერს“.

„უვიზო მიმოსვლას არაფერი არ აქვს გადასარჩენი თუ კი, იქნება სამართლიანი დამოკიდებულება საქართველოსთან მიმართებით. საქართველო ყოველთვის ძალიან კარგად ასრულებდა იმ ვალდებულებებს, რაც უკავშირდება ევროკავშირთან ურთიერთობებს, მათ შორის, ასოცირების შეთანხმებას. თუ კი, ვინმეს შეიძლება, ეჭვები ჰქონდეს, ვინ ასრულებს თუ ვინ არ ითვალისწინებს ამ ვალდებულებებს, ეს სხვა მხარეს არის.

რისი საფრთხე არსებობს და ვინ შექმნა ეს საფრთხე? ჩვენ ამაზე არაერთხელ გვითქვამს და კიდევ ერთხელ გავიმეორებ, ეს არის ინსტრუმენტალიზაცია ევროკავშირთან ურთიერთობების. სხვა მიზეზი, სხვა საფუძველი არ არსებობს, რომ ამ თემაზე საქართველოსთან მიმართებით საერთოდ საუბარი იყოს“, - განაცხადა მაკა ბოჭორიშვილმა.