თბილისის საქალაქო სასამართლოში, 4 ოქტომბრის აქციის ფარგლებში დაკავებულების - გოჩა ყატაშვილის, საბა კორძაიას, სულხან აბრალავას, ბექა ქელეხსაშვილის, გიორგი კიკნაველიძისა და ნანა სანდერის სასამართლო მიმდინარეობს.

დღევანდელ სხდომაზე დაკავებულების მიმართ აღკვეთის ღონისძიების შეფარდებაზე იმსჯელებენ.

პროკურატურა 4 ოქტომბერს თბილისში მიმდინარე მოვლენებთან დაკავშირებით ბრალდებულების მიმართ აღკვეთის ღონისძიების სახით პატიმრობას მოითხოვს. როგორც ბრალდების მხარე განმარტავდა ბრალდებულებმა შესაძლოა, რომ ახალი დანაშაული ჩაიდინონ, მტკიცებულებები გაანადგურონ ან მიიმალონ. პროკურატურის მოთხოვნას არ დაეთანხმა დაცვის მხარე და ბრალდებულების მიმართ აღმკვეთი ღონისძიების გარეშე დატოვებას ითხოვს, ასევე, დაცვის მხარე თანახმაა, რომ ბრალდებულების მიმართ - გირაო იყოს გამოყენებული. მათი თქმით, ბრალდების მხარის შუამდგომლობა დაუსაბუთებელია.

ბრალდებული ნანა სანდერის ადვოკატმა განაცხადა, რომ მათ დროის სიმცირის გამო ვერ მოახერხეს, რომ საქმის მასალებს გასცნობოდნენ, აქედან გამომდინარე, მოსამართლის აცილების შუამდგომლობა დააყენა, რომელსაც სხვა ადვოკატებიც დაეთანხმნენ.

ერთ-ერთი ადვოკატის თქმით, კი მოსამართლის - ფიქრია სიქტურაშვილის მეუღლე ძალოვანი სტრუქტურის თანამშრომელია, რაც მას აფიქრებინებს, რომ მოსამართლე არაობიექტური იქნება.

ცნობისთვის, ათონელის სასახლესთან განვითარებულ მოვლენებში მონაწილე პირების მიმართ გამოძიება სისხლის სამართლის კოდექსის 317-ე, 222-ე, 225-ე და 187-ე მუხლებით მიმდინარეობს. აღნიშნული გამოძიების ფარგლებში ჯამში 36 ადამიანია დაკავებული.