მოსამართლემ 4 ოქტომბრის აქციის ფარგლებში დაკავებული ნანა სანდერი სასამართლო დარბაზიდან გააძევა.

მიზეზი გახდა, ადვოკატების შუამდგომლობა, მოსამართლის - ფიქრია სიქტურაშვილის აცილებასთან დაკავშირებით, რომელიც არ დაკმაყოფილდა.

მოსამართლის გადაწყვეტილებას ნანა სანდერის რეპლიკა მოჰყვა:

"შენიშვნას აქეთ მოგცემთ თქვენ. ლეგიტიმური გგონიათ თავი? შენ არ გეგონოს შენი თავი ლეგიტიმური! აქ არ მთავრდება ცხოვრება", - მიმართა ნანა სანდერმა მოსამართლეს, რის შემდეგაც ის ფიქრია სიქტურაშვილმა დარბაზიდან გააძევა.

ამ წუთებში, თბილისის საქალაქო სასამართლოში, 4 ოქტომბრის აქციის ფარგლებში დაკავებულების - გოჩა ყატაშვილის, საბა კორძაიას, სულხან აბრალავას, ბექა ქელეხსაშვილის, გიორგი კიკნაველიძისა და ნანა სანდერის სასამართლო მიმდინარეობს. სასამართლო დაკავებულების მიმართ აღკვთის ღონისძიების შეფარდებაზე მსჯელობს.

ცნობისთვის, ათონელის სასახლესთან განვითარებულ მოვლენებში მონაწილე პირების მიმართ გამოძიება სისხლის სამართლის კოდექსის 317-ე, 222-ე, 225-ე და 187-ე მუხლებით მიმდინარეობს. აღნიშნული გამოძიების ფარგლებში ჯამში 36 ადამიანია დაკავებული.