თბილისის საქალაქო სასამართლომ 4 ოქტომბრის მოვლენებთან დაკავშირებით დაკავებულ აკადემიკოსს, ექიმ გიორგი ჩახუნაშვილს აღკვეთის ღონისძიების სახით 20 000-ლარიანი საპატიმრო გირაო შეუფარდა. შესაბამისად, ის თანხის გადახდის შემდეგ გათავისუფლდება.

გადაწყვეტილება მოსამართლე ვალერიან ბუგიანიშვილმა ცოტა ხნის წინ გამოაცხადა.

სასამართლოს გირაოს შეფარდებაზე შუამდგომლობით პროკურატურამ მიმართა.

ბრალდების მხარის თქმით, გასათვალისწინებელია გიორგი ჩახუნაშვილის პროფესია, ასაკი და ჯანმრთელობის მდგომარეობა, რაც იძლევა იმის საფუძველს, რომ მის მიმართ გამოყენებული იყოს ნაკლებად მკაცრი აღკვეთის ღონისძიება 20 ათას ლარიანი გირაოს ოდენობით.

დაცვის მხარემ კი უარყო ბრალდება და აღნიშნა, რომ არ არსებობს ფაქტობრივი მტკიცებულება, რომელიც მისი დაცვის ქვეშ მყოფის ბრალეულობას დაამტკიცებს. შესაბამისად, ადვოკატი არ დაეთანხმა პროკურატურის შუამდგომლობას აღკვეთის ღონისძიებაზე და მოსამართლეს პირადი თავდებობა შესთავაზა. დაცვის მხარის თქმით, ექიმ გიორგი ჩახუნაშვილს თავდებში ოთხი პირი დაუდგება - მისი ვაჟი, ექიმი კონსტანტინე ჩახუნაშვილი, მალხაზ გომელაური, ექიმი ვაჟა გაფრინდაშვილი და თამილა ლაფანაშვილი.

სიტყვის უფლებით ისარგებლა გიორგი ჩახუნაშვილმა და მოსამართლეს უთხრა, რომ წაყენებულ ბრალში თავს დამნაშავედ არ თვლის.

„არ ვთვლი, რომ დანაშაული ჩავიდინე. ყოფნით ვიყავი იქ, მაგრამ მე დანაშაული არ ჩამიდენია, ვასრულებდი ჩემს სამედიცინო მოვალეობას აქციის დაწყებიდან მის ბოლომდე. ხალხს გავუწიე პირველი სამედიცინო დახმარება და დღესაც იგივეს გავაკეთებდი. ვემხრობი ევროპულ სტანდარტებს და აქციაზეც ვიყავი, მაგრამ რაიმე დანაშაულებრივ ქმედებაში მონაწილეობა არ მიმიღია.

ახლა როგორ უნდა გავხდე 71 წლის ასაკში საშიში, ცხოვრების ყველა ეტაპზე სულ სიკეთე მაქვს ნაკეთები. საშიში არასდროს არც ვყოფილვარ და არც ვიქნები“, - განაცხადა გიორგი ჩახუნაშვილმა.