თბილისის სააპელაციო სასამართლოში პოლიციელზე თავდასხმაში მსჯავრდებულის, საბა ჯიქიას სასამართლო პროცესი მიმდინარეობს. ამ ეტაპზე სააპელაციო სასამართლო, თბილისის საქალაქო სასამართლოს გადაწყვეტილებაზე იმსჯელებს, რომლის მიხედვითაც მოსამართლემ საბა ჯიქია, პოლიციელზე თავდასხმის ბრალდებაში დამნაშავედ ცნო და მას 4 წლითა და 6 თვის ვადით თავისუფლების აღკვეთა მიუსაჯა.

პროკურორი თამარ იაკობიძე საბა ჯიქიასთვის სასჯელის დამძიმებას, ხოლო ადვოკატი, გუჯა ავსაჯანიშვილი, სასჯელის გაუქმებას ითხოვს.

პროცესს ესწრება მსჯავრდებული საბა ჯიქიაც.

ინფორმაციისთვის, საბა ჯიქია პოლიციელზე თავდასხმის ბრალდებით 2024 წლის 5 დეკემბერს დააკავეს. პროკურატურა მას 30 ნოემბერს, საპროტესტო აქციაზე პოლიციელისთვის ფეხის ჩარტყმას ედავებოდა.

ცნობისთვის, საბა ჯიქიას ბრალი სისხლის სამართლის კოდექსის 353-ე პრიმა მუხლის პირველი ნაწილით ჰქონდა წარდგენილი, რაც პოლიციელზე თავდასხმას გულისხმობს.

აღნიშნული ბრალი 4-დან 7-წლამდე თავისუფლების აღკვეთას ითვალისწინებს.