სამოქალაქო აქტივისტმა, ისაკო დევიძემ 20-დღიანი ადმინისტრაციული პატიმრობის შემდეგ, დროებითი მოთავსების იზოლატორი დატოვა.

აღნიშნულის შესახებ დევიძე სოციალურ ქსელ „ფეისბუქში“ თავად წერს.

„სალამი, მეგობრებო! გამოვედი კარგად დასვენებული და საბრძოლო შემართებით! ბრძოლა გრძელდება გამარჯვებამდე საქართველოს სიყვარულისათვის! თავისუფლება რეჟიმის ტყვეებს!“, - წერს დევიძე.

ცნობისთვის, პარლამენტთან საპროტესტო აქციის დროს დაკავებული ისაკო დევიძე სასამართლომ 25 სექტემბერს ადმინისტრაციულ სამართალდამრღვევად სცნო.

თბილისის საქალაქო სასამართლოს მოსამართლის, ზვიად ცეკვავას გადაწყვეტილებით, დევიძეს 20 - დღიანი ადმინისტრაციული პატიმრობა შეუფარდა.

სამოქალაქო აქტივისტი 24 სექტემბერს, ადმინისტრაციულ სამართალდარღვევათა კოდექსის 166-ე და 173-ე მუხლებით დააკავეს, რაც წვრილმან ხულიგნობასა და პოლიციელის კანონიერი მოთხოვნისადმი დაუმორჩილებლობას გულისხმობს.