„ძლიერი საქართველოს” საგარეო მდივანი, გრიგოლ გეგელია ბრიუსელში მიმდინარე ALDE-ს ალიანსის ყრილობის ფარგლებში ევროკომისარ მარტა კოსს შეხვდა. ამის შესახებ ინფორმაციას „ძლიერი საქართველოს“ პრესსამსახური ავრცელებს.

როგორც გავრცელებულ ინფორმაციაშია ნათქვამი, გრიგოლ გეგელიამ და მარტა კოსმა საუბრისას განიხილეს „საქართველოში არსებული უმძიმესი ვითარება, „ქართული ოცნების” რეჟიმის მიერ დაანონსებული დიქტატურა და პოლიტიკური პარტიების აკრძალვა, ისევე როგორც მასშტაბური პოლიტიკური რეპრესიები თავისუფალი მოქალაქეების წინააღმდეგ“.

კოალიციის ცნობით, „საუბარი ასევე შეეხო ევროკავშირის ნოემბრის ანგარიშს და პრორუსული რეჟიმის მიერ საგანგებოდ შეცვლილ პოლიტიკურ კურსს, რის გამოც წლების განმავლობაში არცერთი საკვანძო რეფორმა არ შესრულებულა“.

„ევროკომისარ კოსს მადლობა გადავუხადე ყველა იმ ქართველის სახელით, ვისთვისაც წარმოუდგენელია რუსული სტილის დიქტატურაში ცხოვრება. ჩვენმა პარტნიორებმა კარგად იციან, რომ ასეთი ქართველები ისტორიულად წარმოვადგენთ ჩვენი დიადი, მებრძოლი ერის უმრავლესობას. შესაბამისად, ისინი სრულად უჭერენ მხარს ქართველთა მშვიდობიან, დემოკრატიულ ბრძოლას ეროვნული და ევროპული პრინციპების განხორციელების მიზნით. ჩვენი ერთობლივი ძალისხმევა აუცილებლად გაიმარჯვებს, რაც იქნება ჩვენი სახელმწიფოს ინტერესის გამარჯვებაც”, - განაცხადა გრიგოლ გეგელიამ.