საფრანგეთი უახლოეს დღეებში უკრაინას დამატებით Mirage საბრძოლო თვითმფრინავებსა და Aster ჰაერსაწინააღმდეგო რაკეტებს გადასცემს. ამის შესახებ საფრანგეთის პრეზიდენტმა, ემანუელ მაკრონმა „მსურველთა კოალიციის” ვიდეოზარის დროს განაცხადა. მისი სიტყვები ფრანგულ ტელეარხ TF1-ს მოჰყავს.

„უნდა გავაგრძელოთ უკრაინისთვის ჩვენი სამხედრო დახმარების გაძლიერება: საჰაერო თავდაცვის სისტემები, შორი მანძილის შესაძლებლობები, დრონები და დრონების საწინააღმდეგო სისტემები“, - განაცხადა მაკრონმა.

საფრანგეთის პრეზიდენტმა აღნიშნა, რომ საფრანგეთი უახლოეს დღეებში უკრაინას დამატებით Aster ჰაერსაწინააღმდეგო რაკეტებსა და Mirage საბრძოლო თვითმფრინავებს გადასცემს. მას არ დაუზუსტებია, რა რაოდენობაზეა საუბარი.

მაკრონმა ცალკე რუსეთის წინააღმდეგ სანქციებზეც ისაუბრა. მისი თქმით, ევროკავშირის ბოლო სანქციებმა „უნდა იმოქმედოს რუსეთის საბრძოლო ქმედებების დაფინანსებაზე”.