CNN - აშშ-მა კარიბის ზღვის აუზში მსოფლიოში უდიდესი ავიამზიდი გაგზავნა
აშშ-მა კარიბის ზღვის აუზში მსოფლიოში უდიდესი ავიამზიდი გაგზავნა, - ინფორმაციას CNN-ი ავრცელებს.
ავიამზიდ USS Gerald Ford-ის დამრტყმელი ჯგუფის ვენესუელის სანაპიროსთან გადაყვანის ბრძანება აშშ-ის თავდაცვის მდივანმა, პიტ ჰეგსეტმა გასცა.
„აშშ-ის სამხრეთის სარდლობის პასუხისმგებლობის ზონაში აშშ-ის სამხედრო ძალების ყოფნა არალეგალური აქტორებისა და აქტივობების წინააღმდეგ აშშ-ის შესაძლებლობებს გააძლიერებს“, - განაცხადა პენტაგონის წარმომადგენელმა, შონ პარნელმა.
ამასთან, გამოცემის ინფორმაციით, აშშ-ის პრეზიდენტი ვენესუელის ტერიტორიაზე კოკაინის საწარმოო ობიექტებსა და ნარკოტრეფიკინგის მარშრუტებზე დარტყმებს განიხილავს, თუმცა გადაწყვეტილება ჯერ არ მიუღია.
„არსებობს გეგმები, რომლებსაც პრეზიდენტი განიხილავს. ის დიპლომატიის გამოყენებასაც არ გამორიცხავს“, - განუცხადა გამოცემას ერთ-ერთმა ამერიკელმა ოფიციალურმა პირმა.
