მე ვფიქრობ, ამ საკითხებით დრო არ უნდა დავკარგოთ, რადგან ჩვენი ქვეყნისთვის უფრო მნიშვნელოვანი თემები გვაქვს. რამდენი ადამიანი შეიკრიბება, ეს საერთოდ არ არის საინტერესო. ხედავთ, რომ მათ არანაირი მხარდაჭერა, არანაირი თანადგომა არ აქვთ, - ასე აფასებს თბილისის მერი, კახა კალაძე 26 ოქტომბერს გამართულ საპროტესტო აქციას.

მისი თქმით, ქვეყნის უმრავლესობა მხარს „ქართულ ოცნებას“ უჭერს.

„მე ბევრჯერ მითქვამს და კიდევ ერთხელ გავიმეორებ, რომ ყოველთვის, როდესაც წარმოადგენ პოლიტიკურ პარტიას, ხარ პოლიტიკაში, ყველაზე მნიშვნელოვანი არის ქართველი ხალხის მხარდაჭერა. დღეს „ქართული ოცნება-დემოკრატიული საქართველო“ არის ის პოლიტიკური ძალა, ვისაც ქვეყნის უმრავლესობა უჭერს მხარს, ემხრობა იმ პოლიტიკურ პოლიტიკას, რომელსაც ჩვენი გუნდი ახორციელებს, შესაბამისად, ეს ადამიანები არიან უმცირესობაში, დამარცხებულები არიან. მე მინდა ვიქონიო იმედი, რომ ბევრი გააანალიზებს და გააცნობიერებს, თუ რა პროცესები მიდის, რა ხდება, როგორ იყენებენ მათ, როგორ სწირავენ თუნდაც ციხისთვის, ეს არის მოცემულობა. შესაბამისად, ვისაც აქვს ანალიზის უნარი და შეუძლია გააკეთოს სწორი დასკვნები,ეს მათი საქმეა“, - განაცხადა კალაძემ.