ნინო დათაშვილის ჯანმრთელობის მდგომარეობა კრიტიკულად მძიმეა, ის არის ტანჯვის მდგომარეობაში - დაუშვებელია, სასამართლო შეეგუოს იმას, რომ პატიმრობა პროკურატურის სურვილისამებრ დაუშვას, - ამის შესახებ პედაგოგ ნინო დათაშვილის ადვოკატმა, თამარ გაბოძემ განაცხადა.

მისი თქმით, ნინო დათაშვილის ჯანმრთელობის მდგომარეობა დამძიმდა, რაზეც სრული პასუხისმგებლობა პროკურატურას ეკისრება.

თამარ გაბოძის თქმითვე, დღევანდელ სასამართლო სხდომაზე, მოსამართლეს ნინო დათაშვილისთვის შეფარდებული აღკვეთის ღონისძიების გაუქმების შუამდგომლობით მიმართავენ.

„ნინო დათაშვილის ჯანმრთელობის მდგომარეობა კრიტიკულად მძიმეა, ის არის ტანჯვის მდგომარეობაში, რაზეც ჩვენ 4 თვის განმავლობაში ვსაუბრობდით და მოლოდინები გამართლდა - მისი ხერხემალი არ იძლეოდა მის პატიმრობაში ყოფნის საშუალებას. გარდა იმისა, რომ ნინო უდანაშაულო პატიმარია, სხდომაზე ამაზე საუბარს არ ვაპირებ, მნიშვნელოვანია, რომ ნინო პატიმრობიდან გათავისუფლდეს. წარმოიდგინეთ, ვერ ამოძრავებთ კისერს და კიდურებს და უკანონო პატიმრობაში იმყოფებით. დაუშვებელია სასამართლომ არ დააკმაყოფილოს დაცვის მხარის შუამდგომლობა, რომ ნინო დათაშვილი დაუყოვნებლივ გათავისუფლდეს პატიმრობიდან.

ნინო, შესაძლოა, სხდომას დისტანციურად დაესწროს, რადგან ვერ ხერხდება მისი ბადრაგირება მისი ჯანმრთელობის მდგომარეობიდან გამომდინარე. მას გადაადგილება არ შეუძლია, ვერ ამოძრავებს კისერს და კიდურებს. თითოეული დღე მისთვის არის ტკივილისა და ტანჯვის გაძლება. დაუშვებელია, ასამართლო შეეგუოს იმას, რომ პატიმრობა პროკურატურის სურვილისამებრ დაუშვას“, - განაცხადა თამარ გაბოძემ.

ცნობისთვის, ნინო დათაშვილი თბილისის საქალაქო სასამართლოში 9 ივნისს მომხდარი ფაქტის გამო 20 ივნისს დააკავეს. მას ბრალდება საქართველოს სისხლის სამართლის კოდექსის 353-ე სეკუნდა მუხლის მე-3 ნაწილით წარედგინა, რაც გულისხმობს საჯარო მოსამსახურეზე თავდასხმას, მის მიერ სამსახურებრივი მოვალეობის შესრულების დროს. აღნიშნული სასჯელის სახედ და ზომად ჯარიმას, ან 4-დან 7 წლამდე თავისუფლების აღკვეთას ითვალისწინებს.