ეკონომიკისა და მდგრადი განვითარების მინისტრის ყოფილი მოადგილის, რომეო მიქაუტაძის საქმეზე თბილისის საქალაქო სასამართლოში მოწმეებს ჰკითხავენ.

ამ წუთებში ჩვენებას ერთ-ერთი ჰესის ყოფილი დირექტორი, ზაზა სიხარულიძე აძლევს.

მისი ჩვენების მიხედვით, თუკი ჰესთან დაკავშირებით რამე პრობლემა იქნებოდა, მას მიქაუტაძე უთანხმებდა.

„ჰესი იმდენად ცუდად მუშაობდა, თავის თავს ვერ ინახავდა, მერე ნელ-ნელა გაიმართა, ბოლოს მოგებაზეც წავიდა.

თუ საჭირო იყო სარემონტო სამუშაოები, [რომეო მიქაუტაძესთან] ვათანხმებდი, რა თანხები დაიხარჯებოდა. ძირითადად, ტელეფონით, ხანდახან ვხვდებოდით პირადად“, - განაცხადა მოწმემ.

პროცესს ესწრება რომეო მიქაუტაძეც.

დღევანდელ სხდომაზე ბრალდების მხარის მტკიცებულებებს იკვლევენ. პროკურატურას კიდევ ერთი მოწმე ეყოლება წარმოდგენილი.

ცნობისთვის, პროკურატურის ბრალის მიხედვით, რომეო მიქაუტაძე სისტემატურად ბოროტად იყენებდა სამსახურებრივ უფლებამოსილებას, რასაც თან ახლდა განსაკუთრებით დიდი ოდენობით შემოსავლის მიღება.

სამართალდამცველებმა ეკონომიკის და მდგრადი განვითარების მინისტრის ყოფილი პირველი მოადგილე 20 ივნისს დააკავეს. მას ბრალი სისხლის სამართლის კოდექსის რამდენიმე მუხლით აქვს წარდგენილი.