ტანზანიის მთავარი ოპოზიციური პარტია პოლიციას ასობით დემონსტრანტის დახოცვასა და მათი ცხედრების თავიდან მოშორებაში ადანაშაულებს, - ინფორმაციას CNN-ი ავრცელებს.

ტელეკომპანიის ცნობით, ტანზანიაში საპროტესტო აქციები გასული კვირის ოთხშაბათს დაიწყო, როდესაც არჩევნებში მოქმედმა პრეზიდენტმა, სამია სულუჰუ ჰასანმა გაიმარჯვა.

მომიტინგეები ჰასანის მთავარი კონკურენტების არჩევნებიდან ჩამოშორებას აპროტესტებენ. სამართალდამცავებსა და მომიტინგეებს შორის შეტაკებები მოხდა, რის შემდეგაც ხელისუფლებამ კომენდანტის საათი დააწესა და ინტერნეტი გათიშა.

ოპოზიციურ პარტია „ჩადემას“ გასულ კვირას გამართულ საპარლამენტო და საპრეზიდენტო არჩევნებში მონაწილეობის უფლება არ მისცეს. მისი ლიდერი ტუნდუ ლისუ ღალატის ბრალდებით დააკავეს მას შემდეგ, რაც ჰასანის მთავრობამ ის 29 ოქტომბრის არჩევნების ჩაშლის დაგეგმვაში დაადანაშაულა.

CNN-ს პარტიაში განუცხადეს, რომ გარდაცვალების 2 000 ფაქტი დააფიქსირეს და რომ პოლიციამ ასობით ცხედარი თავიდან მოიშორა.

CNN-ი იუწყება, რომ ვერ შეძლეს დაღუპულთა რაოდენობის გადამოწმება, მთავრობის წარმომადგენელმა კი საპროტესტო აქციებზე რეაგირების შესახებ კითხვას არ უპასუხა.