დაცული ტერიტორიების სააგენტოში ხმაური იყო. კერძოდ, მოქალაქეები, „ბალდის კანიონის მცველები“, სააგენტოს ხელმძღვანელთან, შეხვედრას ითხოვენ და მოუწოდებენ შეწყვიტოს კანიონთან დაკავშირებული ძველი ხელმძღვანელის მიერ დადებული ხელშეკრულება. ამასთან, მოითხოვენ, გაუქმდეს ბალდის კანიონის იჯარის ხელშეკრულება.

„მივმართავთ დაცული ტერიტორიების სააგენტოს ახალ თავმჯდომარეს და გარემოს დაცვისა და სოფლის მეურნეობის მინისტრს: არ გაახანგრძლივოთ კორუფცია, არ დააფაროთ ხელი სოფელზე მოძალადე კომპანიას, გააუქმეთ ბალდის კანიონის იჯარის ხელშეკრულება“,- აღნიშნავენ აქციის მონაწილეები.

მას შემდეგ, რაც აქციის მონაწილეები დაცული ტერიტორიების სააგენტოში შევიდნენ, ადგილზე საპატრულო პოლიცია მივიდა.

ფაქტს გამოეხმაურა დაცული ტერიტორიების სააგენტოც. როგორც სააგენტოში განმარტავენ, მათ მიერ განხორციელებული ყველა პროექტი და გაფორმებული ხელშეკრულება სრულ შესაბამისობაშია საქართველოს კანონმდებლობასთან და ხორციელდება გამჭვირვალე, სამართლებრივ ჩარჩოებში.

რაც შეეხება შეხვედრებს, სააგენტოში აღნიშნავენ რომ „სააგენტოსთვის მნიშვნელოვანია, ნებისმიერი შეხვედრა წარიმართოს სამუშაო, კონსტრუქციულ გარემოში, რომლის მიზანიც არის საერთო ხედვებისა და შედეგზე ორიენტირებული გადაწყვეტილებების მიღწევა“.

ამასთან, განმარტავენ, რომ „სააგენტო მიუღებლად მიიჩნევს ულტიმატუმების ენით კომუნიკაციას და კიდევ ერთხელ ადასტურებს მზადყოფნას, იმუშაოს ყველა დაინტერესებულ მხარესთან პროფესიულ, საქმეზე ორიენტირებულ ფორმატში“.