ზუგდიდში, ალტე უნივერსიტეტის ორგანიზებითა და საქართველოს ინოვაციებისა და ტექნოლოგიების სააგენტოს მხარდაჭერით მსოფლიოს ყველაზე დიდი ჰაკათონი - NASA International Space Apps Challenge 2025 გაიმართა. ღონისძიება მონაწილეებს 4–5 ოქტომბერს მასპინძლობდა.

ჰაკათონის “NASA Space Apps Challenge 2025 Zugdidi“ გამარჯვებული გუნდი - “Skill Issue“ გახდა, რომელიც გლობალურ ნომინანტებს შორის დასახელდა! მათი პროექტი „Sateliko“, მსოფლიოს მასშტაბით, 11,500-ზე მეტი ინიციატივიდან შეირჩა.

ზუგდიდის გუნდმა იმუშავა გამოწვევაზე - “Commercializing Low Earth Orbit (LEO)” და შექმნა ინოვაციური პროტოტიპი - „Sateliko“. ეს არის დისტანციური ავტომატიზებული სახელოსნო, რომელიც ხელახალი გამოყენების ნანო-თანამგზავრების წარმოების შესაძლებლობას ქმნის. მისი მიზანია, სტუდენტებსა და მეცნიერებს მისცეს შესაძლებლობა, გამოიკვლიონ დაბალი ორბიტა რაკეტის გაშვების საჭიროების გარეშე.

გუნდის Skill Issue წევრები არიან:

• დავით ტატუნაშვილი

• ანი ხარზიანი

• ლაზარე ჩაჩუა

• გუგა მუჩიაშვილი

• ალექსანდრე მუჯირი

• ანტონ სვარიჩევსკი

ჰაკათონის მიმდინარეობისას გუნდს მენტორობას უწევდნენ ალტე უნივერსიტეტის ლექტორები - გიორგი თაყაძე და გიორგი გრიგოლია და იდეის განვითარებისა და პროტოტიპის შედგენის პროცესში ეხმარებოდნენ.

Space Apps Challenge არის ყოველწლიური გლობალური ინოვაციური პროექტი, რომელსაც აშშ-ის კოსმოსური სააგენტო - NASA უწევს ორგანიზებას. ჰაკათონში ყოველწლიურად ათასობით ადამიანი მონაწილეობს მსოფლიოს 160-ზე მეტი ქვეყნიდან.

2025 წლის ჰაკათონის თემა იყო - “Learn, Launch, Lead!” და ახალგაზრდებისთვის ისეთი გარემოს შექმნას ისახავდა მიზნად, სადაც ინოვაციური იდეები რეალურ გამოწვევებზე მუშაობით ყალიბდება.

ალტე უნივერსიტეტი “Skill Issue“-ს ულოცავს ამ მნიშვნელოვან წარმატებას და კვლავ აქტიურად აგრძელებს ახალგაზრდებისთვის საინტერესო ინოვაციური პროექტების შეთავაზებას.

(R)