გვინეა-ბისაუში სამხედროებმა სახელმწიფო გადატრიალება მოაწყვეს, - ინფორმაციას Reuters-ი ავრცელებს.

გვინეა-ბისაუში საპრეზიდენტო არჩევნების შედეგების გამოცხადებამდე ერთი დღით ადრე, ოთხშაბათს საღამოს, სამხედრო ოფიცრების ჯგუფის წარმომადგენელმა სახელმწიფო ტელევიზიის ეთერით განცხადება გაავრცელა, რომლის მიხედვით სამხედროებმა პრეზიდენტი, უმარო სისოკო ემბალო არჩევნებში ჩარევაში დაადანაშაულეს და თანამდებობიდან გადააყენეს.

ასევე, სამხედრო ოფიცრებმა ქვეყანაში საარჩევნო პროცესი შეაჩერეს, საზღვრები დაკეტეს და კომენდანტის საათი დააწესეს.

სამხედროების განცხადებიდან მალევე პრეზიდენტმა ემბალომ France 24-ს განუცხადა, რომ „თანამდებობიდან გადააყენეს“.

ჯერჯერობით უცნობია დააკავეს თუ არა სამხედროებმა პრეზიდენტი.

საარჩევნო კომისიას კვირას გამართული არჩევნების წინასწარი შედეგები 27 ნოემბერს უნდა გამოეცხადებინა. საპრეზიდენტო არჩევნებში ემბალოს მეტოქე ოპოზიციის კანდიდატი, ფერნანდო დიასი იყო. არჩევნებში გამარჯვება ორივე კანდიდატმა წინასწარ გამოაცხადა.