მშრალი შიმშილობა მაქვს გამოცხადებული. მიცვალებული ორჯერ არ კვდება, მე სოხუმში დავიღუპე, სიცოცხლეს მხოლოდ სიყვარულისთვის ვაგრძელებ, - ამის შესახებ ათონელის სასახლესთან, 4 ოქტომბერს განვითარებულ მოვლენებთან დაკავშირებით დაკავებულმა ზურაბ ჭავჭანიძემ განაცხადა.

მან საკუთარ სასამართლო პროცესზე ვრცლად ისაუბრა.

„მე ვარ სოხუმელი, სოხუმში 15 ვაჟკაცი დავკარგე, თუ გამოვდივარ, მათი სულები არ მაძლევენ საშუალებას გავჩერდე, რადგან მათი თავი რუსებთან ბრძოლამ წამართვა. ხილვასავით მქონდა, რას ნიშნავს რუსული მმართველობა. რუსული მმართველობის ქვეშ მილიონამდე ქართველი მოკლეს, რუსეთის ოცნებაა „საქართველო ქართველების გარეშე"....

მედროშეს მეძახიან, ევროკავშირის და საქართველოს დროშა რომ უჭირავს, ის ვარ მე. დედამიწის ზურგზე ვერავინ ამიხსნის როგორ ვარ ცოცხალი დარჩენილი, ღმერთმა მოახდინა სასწაული.

მშრალი შიმშილობა მაქვს გამოცხადებული. მიცვალებული ორჯერ არ კვდება, მე სოხუმში დავიღუპე, სიცოცხლეს მხოლოდ სიყვარულისთვის ვაგრძელებ... გამარჯვებულები შურს არ იძიებენ არსად და არასდროს",- განაცხადა ჭავჭანიძემ.

ცნობისთვის, ვლადიმერ გველესიანს, ზურაბ ჭავჭანიძეს, სერგო მეგრელიშვილს, გიორგი რურუას, ამირან დოლიშვილს, ანტონ ვარდანიძეს, გიორგი ქორქიას, ალექსანდრე ჩილაჩავას, გენადი კუპრეიშვილს, ლაშა ივანაძეს, ლევან ჯიქიას, სულხან ტუღუშს, ხვიჩა გოგოხიასა და რამაზ მუმლაძეს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის “ა“ ქვეპუნქტით წარედგინათ, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს ჩადენილს ჯგუფურად. მათ ბრალდება სსსკ-ის 225-ე მუხლის მეორე ნაწილით აქვს წარდგენილი, რაც ჯგუფურ ძალადობაში მონაწილეობას გულისხმობს.