პრეზიდენტ პუტინს ჯარედ კუშნერთან და სტივ უიტკოფთან ძალიან კარგი შეხვედრა ჰქონდა, - ამის შესახებ აშშ-ის პრეზიდენტმა, დონალდ ტრამპმა თეთრ სახლში ჟურნალისტებს განუცხადა.

„არ ვიცი კრემლი რას აკეთებს. შემიძლია გითხრათ, რომ მათ საკმაოდ კარგი შეხვედრა ჰქონდათ პრეზიდენტ პუტინთან. გავიგებთ, თუ რა შედეგი იქნება. პრეზიდენტ პუტინს ჯარედ კუშნერთან და სტივ უიტკოფთან ძალიან კარგი შეხვედრა ჰქონდა. ვერ გეტყვით, თუ რა შედეგს მივიღებთ ამ შეხვედრიდან, რადგან ტანგოსთვის ორი ადამიანია საჭირო. ვფიქრობ, უკრაინასთან საკმაოდ კარგი შეთანხმება შევძელით“, - განაცხადა დონალდ ტრამპმა.

მისი თქმით, სტივ უიტკოფსა და ჯარედ კუშნერს კრემლში გამართული შეხვედრის შემდეგ შთაბეჭდილება დარჩათ, რომ რუსეთის პრეზიდენტს ომის დასრულება სურს.

„მას ომის დასრულება სურს. ვფიქრობ, სურს, რომ ნორმალურ ცხოვრებას დაუბრუნდეს. ვფიქრობ, კვირაში ათასობით ჯარისკაცის სიკვდილის ნაცვლად აშშ-თან ვაჭრობა სურს. მათ [უიტკოფი და კუშნერი] ძლიერი შთაბეჭდილება დარჩათ, რომ მას შეთანხმების დადება სურს. ვნახოთ, რა მოხდება“, - აღნიშნა აშშ-ის პრეზიდენტმა.