საქართველოს ტექნიკურ უნივერსიტეტში, სატრანსპორტო სისტემებისა და მექანიკის ინჟინერიის ფაკულტეტზე, საინჟინრო კომპანია „ბაუმერის“ საგანმანათლებლო პროექტის – „ბაუმერის აკადემიის“, ფარგლებში ახალი სადემონსტრაციო სივრცე გაიხსნა. ამის შესახებ ინფორმაციას საქართველოს ტექნიკური უნივერსიტეტი ავრცელებს.

სტუ-ის ცნობით, სპეციალურად მოწყობილი სივრცე განკუთვნილია როგორც სტუდენტებისთვის, ისე „ბაუმერის აკადემიის“ ტრენინგების მონაწილეთათვის. ახალი ინფრასტრუქტურა მათ საშუალებას მისცემთ, პრაქტიკულად გაეცნონ MEP (Mechanical, Electrical, Plumbing) საინჟინრო მიმართულების თანამედროვე სტანდარტებს, ინოვაციურ ტექნოლოგიებსა და რეალური სამუშაო პროცესების სპეციფიკას.

როგორც სტუ-ის ვიცე-რექტორი აცხადებს, სივრცე სრულადაა აღჭურვილი იმ ტიპის მოწყობილობებითა და ტექნიკური რესურსებით, რომლებიც MEP ინდუსტრიაში დღეს გამოიყენება. პროფესორ თამარ წერეთლის თქმით, ახალი სივრცის გახსნა მნიშვნელოვანი ინიციატივაა, რომელიც განსაკუთრებით მნიშვნელოვანია მომავალი ინჟინრების პროფესიული წინსვლისთვის.

„ბაუმერის აკადემიის ახალი სადემონსტრაციო სივრცე ახალგაზრდებს საშუალებას აძლევს, თეორიული ცოდნა რეალურ საინჟინრო გარემოში გამოიყენონ, გაიღრმავონ პროფესიული ხედვა და პრაქტიკულად განივითარონ ის უნარები, რომლებიც თანამედროვე საინჟინრო ინდუსტრიას სჭირდება. განსაკუთრებულ მნიშვნელობას ვანიჭებთ იმას, რომ აღნიშნული სივრცე ქმნის გამოცდილებაზე დაფუძნებული სწავლების სრულფასოვან პლატფორმას, სადაც თეორია და პრაქტიკა ორგანულად ინტეგრირდება. ამ გარემოში სტუდენტებს შესაძლებლობა ეძლევათ უშუალოდ დაესწრონ ტექნოლოგიური პროცესების მიმდინარეობას, ჩაერთონ სხვადასხვა კვლევაში და რეალური პირობების ანალიზისა და მოდელირების გზით ცოდნა გაიღრმავონ. მიგვაჩნია, რომ ასეთი ტიპის ინფრასტრუქტურა ქმნის არსებით წინაპირობას კრიტიკული აზროვნების, ანალიტიკური უნარებისა და პროფესიული კომპეტენციების მდგრადი განვითარებისთვის. ვფიქრობ, რომ ბაუმერის აკადემიის ახალი სივრცე მნიშვნელოვანწილად უწყობს ხელს სტუდენტების მომზადებას იმ გამოწვევებისთვის, რომელთა წინაშეც დგას თანამედროვე საინჟინრო სექტორი, და მათ აძლევს შესაძლებლობას, კონკურენტუნარიან პროფესიონალებად ჩამოყალიბდნენ“, - აცხადებს თამარ წერეთელი.

სტუ-ის სატრანსპორტო სისტემებისა და მექანიკის ინჟინერიის ფაკულტეტის დეკანის თქმით, მსგავსი პროექტები ხელს უწყობს უნივერსიტეტისა და კერძო სექტორის თანამშრომლობის გაღრმავებას, რაც საბოლოოდ მნიშვნელოვნად ზრდის სტუდენტების კონკურენტუნარიანობას შრომით ბაზარზე. პროფესორ ბორის გითოლენდიას განცხადებით, კომპანიასთან პარტნიორობა მომავალშიც გაგრძელდება და პროგრამა კიდევ უფრო გაფართოვდება, რათა სტუდენტებს მიეცეთ უფრო მეტი პრაქტიკული გამოცდილებისა და პროფესიული განვითარებისთვის საჭირო შესაძლებლობები.

„პრაქტიკულ სწავლებაზე ორიენტირებული, თანამედროვე სტანდარტებით შექმნილი ეს ინოვაციური სივრცე მიზნად ისახავს სტუ-ის სტუდენტების, აკადემიური პერსონალისა და კომპანია „ბაუმერის“ პერსონალისათვის ერთობლივი უახლესი საკვალიფიკაციო პროგრამების, ტრენინგებისა და პრაქტიკული სესიების უზრუნველყოფას. ის ძირითადად სატრანსპორტო სისტემებისა და მექანიკიის ინჟინერიის, ასევე, სამშენებლო ფაკულტეტის დარგობრივი სასწავლო პროგრამებისთვისაა განკუთვნილი და სტუდენტებს მისცემს როგორც თეორიული ცოდნის გაღრმავების, ისე რეალურ სამუშაო პროცესებთან მაქსიმალური დაახლოების შესაძლებლობას“, - აცხადებს პროფესორი ბორის გითოლენდია.