ქართველი ადვოკატებისთვის დღეს მნიშვნელოვანი დღეა - ძალიან მიხარია, რომ აქტივობა დილიდან ძალიან მაღალია, ეს ნიშნავს იმას, რომ თითოეული ადვოკატი ჩვენს ხვალინდელ დღეზე ვფიქრობთ და ვაკეთებთ არჩევანს, - ამის შესახებ ადვოკატთა ასოციაციის თავმჯდომარეობის კანდიდატმა, ირაკლი ყანდაშვილმა განაცხადა.

მისი თქმით, გამარჯვების შემთხვევაში მომდევნო ოთხი წლის განმავლობაში მათი მთავარი პრიორიტეტი ადვოკატების უფლებების დაცვა იქნება.

„ქართველი ადვოკატებისთვის დღეს მნიშვნელოვანი დღეა. ძალიან მიხარია, რომ აქტივობა დილიდან ძალიან მაღალია. ეს ნიშნავს იმას, რომ თითოეული ადვოკატი ჩვენს ხვალინდელ დღეზე ვფიქრობთ და ვაკეთებთ არჩევანს. მოხარული ვარ, რომ პირველი ტური ჩემი გამარჯვებით დასრულდა. კიდევ უფრო მოხარული ვარ, რომ დიდი ნდობა გამოუცხადა ჩემს გუნდს ადვოკატთა კორპუსმა. ჩვენ მზად ვართ, თითოეულ ადვოკატს [დავეხმაროთ], განურჩევლად მათი გაკეთებული არჩევანისა, ჩვენი ერთადერთი მიზანია - პროფესია, პროფესია და პროფესია, რომელსაც ჩვენ განვავითარებთ.

მომდევნო ოთხი წლის განმავლობაში ჩვენი მთავარი აქცენტები იქნება განუხრელად ადვოკატის უფლებრივ დაცვაზე და ადვოკატის საქმიანობის ეფექტურობის, გარემოს გაუმჯობესება, მათი სოციალური და ფინანსური მხარდაჭერისთვის ნაბიჯების გადადგმა“,- განაცხადა ყანდაშვილმა.

ცნობისთვის, საქართველოს ადვოკატთა ასოციაციის საერთო კრების ფარგლებში ასოციაციის თავმჯდომარის არჩევნების მეორე ტური მიმდინარეობს.

ასოციაციის თავმჯდომარეობის კანდიდატები ირაკლი ყანდაშვილი და ირაკლი ჩომახაშვილი არიან.