მათი [ოპოზიციის] ნებისმიერი განცხადება ფასებთან დაკავშირებით, პოპულიზმზე იყო აგებული - დადასტურდა, რომ მათ საზოგადოების პრობლემები და ქვეყანაში მიმდინარე საკითხები არ აინტერესებთ,- ამის შესახებ საპარლამენტო უმრავლესობის ლიდერმა ირაკლი კირცხალიამ განაცხადა.

მისი თქმით, გამოჩნდა, რომ ოპოზიციონერებს „საკუთარი მერკანტილური, აგენტურული პოლიტიკური ვნებები და მიზნები“ აინტერესებთ.

„მინდა საზოგადოებასა და პრემიერ-მინისტრს მივცე პირობა, რომ საგაზაფხულო სესიის დასაწყისშივე, ერთ-ერთი პირველი საკითხი კომისიის შექმნა იქნება და საზოგადოება მოისმენს და დაინახავს იმ რეალურ გამოწვევებს, რომელიც ამ ფასდანამატებისა და არარეალურად მაღალი ფასების ირგვლივ არსებობს.

ოპოზიციის განცხადებები კიდევ ერთხელ მეტყველებს მათ რეალურ მიზნებზე. არაფერს ვამბობ იმ სახელ და გვარებზე, რომლებიც დგანან უმსხვილესი სადისტრიბუციო კომპანიების უკან. იმის შიშით, რომ არ გამომჟღავნდეს ვინ იქცევა არაკეთილსინდისიერად, ამათი [ოპოზიციის] რეალური სახე ვნახეთ. ნებისმიერი განცხადება ფასებთან დაკავშირებით, პოპულიზმზე იყო აგებული. ამ თავიანთი განცხადებით, ამ მოღალატეების განცხადებით დასტურდება, რომ მათ საზოგადოების პრობლემები და ქვეყანაში მიმდინარე საკითხები არ აინტერესებთ, აინტერესებთ მხოლოდ საკუთარი მერკანტილური, აგენტურული პოლიტიკური ვნებები და მიზნები. გამოჩნდა თუ რა პოპულიზმით იყვნენ დაკავებულები, როდესაც პრემიერის განცხადებიდან ერთ წუთში დადგნენ მაღალი ფასების მხარეს.

რაც შეეხება ხაზარაძეს და მისი ოჯახის მფლობელობაში არსებულ უმსხვილეს სადისტრიბუციო კომპანიას და იმ ორმაგ სტანდარტებს, რითაც ეს აგენტურა მოქმედებდა ჩვენს ქვეყანაში, თუ იქნება კითხვები, კომისიაზე აუცილებლად მოუწევთ მოსვლა“,- განაცხადა ირაკლი კირცხალიამ.