აშშ რუსეთის დროშის ქვეშ მცურავი ნავთობტანკერის დაკავების ოპერაციას ატარებს, - ინფორმაციას Reuters-ი წყაროებზე დაყრდნობით ავრცელებს.

გამოცემის ცნობით, ატლანტის ოკეანეში, ისლანდიის ტერიტორიულ წყლებში ნავთობტანკერის Marinera-ს დაკავების ოპერაცია მიმდინარეობს.

წყაროების ინფორმაციით, ოპერაციას აშშ-ის სანაპირო დაცვა და ამერიკელი სამხედროები ახორციელებენ.

ამერიკელმა ოფიციალურმა პირებმა გამოცემას განუცხადეს, რომ ოპერაციის დაწყების დროს ტანკერის მახლობლად რუსული წყალქვეშა ნავი იმყოფებოდა.

ამასთან, Reuters-ი წერს, რომ აშშ-ის სანაპირო დაცვამ საზღვაო ბლოკადის ფარგლებში ვენესუელის სანაპიროსთან კიდევ ერთი ნავთობტანკერი დააკავა.

ცნობისთვის, რუსეთის დროშის ქვეშ მცურავი ნავთობტანკერის დაკავებას აშშ-ის სამხედრო ძალები უკვე ორი კვირაა ცდილობენ.

თავდაპირველად, ნავთობტანკერი Bella 1-ის სახელწოდებით იყო ცნობილი, თუმცა მოგვიანებით ხომალდმა სახელი შეიცვალა. ამჟამად ტანკერს Marinera ჰქვია და გაიანას დროშის ნაცვლად რუსეთის დროშის ქვეშ დაცურავს. რუსეთმა ტანკერის ესკორტირებისთვის წყალქვეშა ნავი და სხვა საზღვაო ხომალდები გაგზავნა.