ევროკავშირის საბჭომ მხარი დაუჭირა არგენტინასთან, ბრაზილიასთან, პარაგვაისთან და ურუგვაისთან თავისუფალი ვაჭრობის შესახებ შეთანხმებას. ამის შესახებ განცხადებას ევროკავშირის საბჭოს პრესსამსახური ავრცელებს.

კერძოდ, აღინიშნება, რომ ევროკავშირის საბჭომ მერკოსურთან (არგენტინა, ბრაზილია, პარაგვაი, ურუგვაი) ორ გადაწყვეტილებას დაუჭირა მხარი: “ევროკავშირი-მერკოსური პარტნიორობის შეთანხმებას” (EMPA) და “დროებით სავაჭრო შეთანხმებას” (iTA).

განცხადების თანახმად, სანამ ევროკავშირის საბჭო შეთანხმებების ფორმალურად გაფორმებას შეძლებს, ევროპარლამენტის მხარდაჭერა იქნება საჭირო. ასევე, EMPA-ს ევროკავშირის წევრი ქვეყნების რატიფიცირება დასჭირდება ძალაში შესასვლელად.

განცხადების თანახმად, მერკოსურთან შეთანხმება მსოფლიოში უდიდეს თავისუფალ სავაჭრო სივრცეს შექმნის, რომელიც 700 მილიონ მომხმარებელს მოიცავს.