დონალდ ტრამპის ადმინისტრაციამ 2025 წელს 100 000-ზე მეტი ვიზა გააუქმა,- ინფორმაციას Reuters-ი აშშ-ის სახელმწიფო დეპარტამენტზე დაყრდნობით ავრცელებს.

„სახელმწიფო დეპარტამენტმა 100 000-ზე მეტი ვიზა გააუქმა, მათ შორის დაახლოებით 8000 სტუდენტური ვიზა და 2500 სპეციალიზებული ვიზა იმ პირებისთვის, რომელთაც კრიმინალური საქმიანობის გამო აშშ-ის სამართალდამცავ ორგანოებთან შეხება ჰქონდათ. ჩვენ გავაგრძელებთ ამ ბანდიტების დეპორტაციას, რათა ამერიკის უსაფრთხოება უზრუნველვყოთ“, - ნათქვამია სახელმწიფო დეპარტამენტის განცხადებაში.

სახელმწიფო დეპარტამენტის პრესსპიკერის მოადგილის, ტომი პიგოტის ცნობით, ვიზების გაუქმების ოთხი ძირითადი მიზეზი დარჩენის ვადის გადაცილება, ნასვამ მდგომარეობაში მართვა, ძალადობა და ქურდობა იყო.

„ეს ახალი რეკორდია და 2024 წელთან შედარებით 150%-ზე მეტით ზრდას წარმოადგენს“, - აღნიშნა სახელმწიფო დეპარტამენტის პრესსპიკერის მოადგილემ.