მინეაპოლისში აშშ-ის საიმიგრაციო აგენტმა ვენესუელელი მამაკაცი დაჭრა, რის შემდეგაც საპროტესტო აქციაზე პოლიციასა და დემონსტრანტებს შორის შეტაკებები მოხდა, - ინფორმაციას Reuters-ი ავრცელებს.

აშშ-ის შიდა უსაფრთხოების დეპარტამენტის განცხადებით, სროლა მაშინ მოხდა, როდესაც საიმიგრაციო სამსახურის ოფიცერი ვენესუელელი მიგრანტის დაკავებას ცდილობდა და ოფიცერს ორი პირი თავს დაესხა.

დეპარტამენტის ცნობით, ვენესუელელი მამაკაცი აშშ-ში უკანონოდ იმყოფება და იგი ავტომობილით გადაადგილდებოდა, როდესაც სამართალდამცავებმა შემოწმების მიზნით შუქნიშანზე გააჩერეს.

„დაკავების თავიდან არიდების მცდელობის დროს, მამაკაცმა შემთხვევის ადგილი საკუთარი ავტომობილით დატოვა და გაჩერებულ ავტომობილს შეეჯახა. ამის შემდეგ გაქცევა ფეხით სცადა“, - ნათქვამია შიდა უსაფრთხოების დეპარტამენტის განცხადებაში.

აშშ-ის საიმიგრაციო სამსახურის ოფიცერი და დაჭრილი მამაკაცი საავადმყოფოში გადაიყვანეს. მის სიცოცხლეს საფრთხე არ ემუქრება.

შემთხვევის შემდეგ საიმიგრაციო და საბაჟო სამსახურის (ICE) წინააღმდეგ მიმდინარე საპროტესტო აქციაზე დემონსტრანტებმა პოლიციელებს ქვები ესროლეს, ხოლო სამართალდამცავებმა დემონსტრანტების დასაშლელად ცრემლსადენი გაზი გამოიყენეს.

მინეაპოლისის მერმა, ჯეიკობ ფრეიმ განაცხადა, რომ „ICE ქალაქში ქაოსს ქმნის“.

ცნობისთვის, ეს ბოლო ერთი კვირის განმავლობაში მინეაპოლისში საიმიგრაციო სამსახურის აგენტების მიერ სროლის მეორე შემთხვევაა. გასულ კვირას საიმიგრაციო და საბაჟო სამსახურის (ICE) აგენტმა საკუთარ ავტომობილში აშშ-ის მოქალაქეს, 37 წლის რენე ნიკოლ გუდს ესროლა, რის შედეგადაც ის გარდაიცვალა.