ირლანდიის საგარეო საქმეთა მინისტრის, ჰელენ მაკენტის განცხადებით, გრენლანდიის საკითხთან დაკავშირებით ტარიფების დაწესების შესახებ აშშ-ის პრეზიდენტ დონალდ ტრამპის განცხადება სრულიად მიუღებელი და ღრმად სამწუხაროა.

ჰელენ მაკენტის თქმით, მშვიდობა და უსაფრთხოება დამოკიდებულია გაეროს ყველა წევრი სახელმწიფოს მიერ გაეროს წესდების ფუნდამენტური პრინციპების დაცვაზე და მსოფლიოში, სადაც ამ პრინციპებს უგულებელყოფენ და ძირს უთხრიან, მდგრადი მშვიდობა და უსაფრთხოება ვერ იქნება.

„ირლანდიამ ნათლად განაცხადა, რომ გრენლანდიის მომავალი არის საკითხი, რომელიც, დემოკრატიული პრინციპებისა და საერთაშორისო სამართლის შესაბამისად, დანიამ და გრენლანდიელმა ხალხმა უნდა განსაზღვროს. ეს არის პოზიცია, რომელიც არ შეიცვლება. სახელმწიფოების სუვერენიტეტისა და ტერიტორიული მთლიანობის პატივისცემა მოლაპარაკებას არ ექვემდებარება. ეს არის გაერთიანებული ერების ორგანიზაციის წესდებისა და საერთაშორისო სამართლის ფუნდამენტური პრინციპი. ეს არის ის, რაც უზრუნველყოფს ყველა ქვეყნის - დიდის თუ პატარას, სამხედრო ალიანსებში გაერთიანებულის თუ ნეიტრალურის - უსაფრთხოებას და დაცულობას“, - აღნიშნა ირლანდიის საგარეო უწყების ხელმძღვანელმა.