აშშ-ში უკრაინის წარმომადგენლები ომის დასასრულებლად საჭირო დოკუმენტებზე მუშაობენ, - ამის შესახებ უკრაინის პრეზიდენტმა ვოლოდიმირ ზელენსკიმ ეროვნული უშიშროებისა და თავდაცვის საბჭოს მდივანთან, რუსტემ უმეროვთან შეხვედრის შემდეგ განაცხადა.

„რუსტემ უმეროვმა პრეზიდენტ ტრამპის წარმომადგენლებთან შეხვედრების შესახებ ანგარიში წარმოადგინა. მოლაპარაკებების რამდენიმე რაუნდი უკვე გაიმართა. ისინი მუშაობენ. ისინი ომის დასასრულებლად საჭირო დოკუმენტებზე მუშაობენ. მნიშვნელოვანია, რომ უკრაინულმა გუნდმა სრულად აცნობოს ამერიკულ მხარეს უკრაინაში მიმდინარე მოვლენების და ჩვენს ენერგოსისტემაზე რუსეთის მუდმივი თავდასხმების შესახებ“, - აღნიშნა ზელენსკიმ.

თავის მხრივ, უმეროვმა განაცხადა, რომ ორი დღის განმავლობაში შეერთებულ შტატებში კირილ ბუდანოვთან და დავით არახამიასთან ერთად მუშაობდა. ამერიკული მხრიდან კონსულტაციებში მონაწილეობდნენ დონალდ ტრამპის სპეციალური წარმომადგენელი სტივენ უიტკოფი, ტრამპის სიძე ჯარედ კუშნერი, აშშ-ის არმიის მდივანი დენიელ დრისკოლი და თეთრი სახლის წარმომადგენელი ჯოშ გრუენბაუმი.

„განვიხილეთ ეკონომიკური განვითარება და კეთილდღეობის გეგმა, ასევე უკრაინის უსაფრთხოების გარანტიები, მათი განხორციელების პრაქტიკულ მექანიზმებზე ფოკუსირებით. ამერიკელ პარტნიორებს მივაწოდეთ ინფორმაცია რუსეთის მიერ უკრაინის ენერგეტიკულ ინფრასტრუქტურაზე ბოლო დროს განხორციელებული თავდასხმების შესახებ. შევთანხმდით, რომ დავოსში კონსულტაციების შემდეგი რაუნდის დროს გუნდურ დონეზე გავაგრძელებთ მუშაობას“, - აღნიშნა უმეროვმა.

უკრაინის დელეგაცია, რომლის შემადგენლობაშიც შედიან ეროვნული უშიშროებისა და თავდაცვის საბჭოს მდივანი რუსტემ უმეროვი, პრეზიდენტის ადმინისტრაციის ხელმძღვანელი კირილ ბუდანოვი და საპარლამენტო ფრაქცია „ხალხის მსახურის“ თავმჯდომარე დავით არახამია, შაბათს, ამერიკულ გუნდთან შესახვედრად, შეერთებულ შტატებში ჩავიდა.