ევროკომისიის პრეზიდენტი ურსულა ფონ დერ ლაიენი დავოსში შეერთებული შტატების კონგრესის ორპარტიულ დელეგაციას შეხვდა, - ამის შესახებ ურსულა ფონ დერ ლაიენი სოციალურ პლატფორმა X-ზე წერს.

„დავოსში შეერთებული შტატების კონგრესის ორპარტიულ დელეგაციას შევხვდი. განვიხილეთ საერთო ძალისხმევა უკრაინაში სამართლიანი და მდგრადი მშვიდობის მისაღწევად. ეს პროცესი სარგებლობს ევროკავშირ-აშშ-ის ძლიერი კოორდინაციით, უსაფრთხოების გარანტიებიდან დაწყებული კეთილდღეობისკენ მიმავალი გზით დამთავრებული“, - აცხადებს ევროკომისიის პრეზიდენტი.

მისი ინფორმაციით, შეხვედრაზე გრენლანდიის საკითხიც განიხილეს.

„შევეხე გრენლანდიისა და დანიის სამეფოს სუვერენიტეტის ცალსახა პატივისცემის აუცილებლობას. ეს უაღრესად მნიშვნელოვანია ჩვენი ტრანსატლანტიკური ურთიერთობებისთვის. ამავდროულად, ევროკავშირი კვლავ მზადაა გააგრძელოს მჭიდრო თანამშრომლობა შეერთებულ შტატებთან, ნატო-სთან და სხვა მოკავშირეებთან, დანიასთან მჭიდრო თანამშრომლობით, ჩვენი საერთო უსაფრთხოების ინტერესების წინსვლის მიზნით. ჩვენ ასევე განვიხილეთ ტრანსატლანტიკური ვაჭრობა და ინვესტიციები. ისინი მნიშვნელოვან აქტივს წარმოადგენენ როგორც ევროკავშირის, ასევე აშშ-ის ეკონომიკისთვის. ტარიფები ეწინააღმდეგება ამ საერთო ინტერესებს“, - აცხადებს ურსულა ფონ დერ ლაიენი.