ნახეთ ზანგეზურის დერეფანი, ტრამპის მარშრუტი, ახლა კიდევ ალიევის განცხადება, ჩვენ ამ ყველაფრიდან ამოვარდნილი ვართ, არა იმიტომ, რომ ვინმემ ამოგვაგდო, არამედ საქართველოს ამჟამინდელმა ფაქტობრივმა ხელისუფლებამ ამისთვის ყველაფერი გააკეთა, - ამის შესახებ დიპლომატმა გია ჯაფარიძემ „პალიტრანიუსის“ გადაცემაში „თავისუფალი სტუდია“ განაცხადა.

გია ჯაფარიძის თქმით, საქართველოსთვის გეოპოლიტიკური ნიშის დაკარგვა ნიშნავს იმას, რომ აღარ ვართ საინტერესო, რითაც ძალიან ვუახლოვდებით დამოუკიდებლობის დაკარგვას.

„პრეზიდენტმა ალიევმა გააჟღერა ის, რაც რაღაც მომენტში აუცილებლად გაჟღერდებოდა. პრინციპში იყო მოსალოდნელი. 2013 წლიდან საქართველო თავის როლს და ფუნქციას კარგავს, რაც იყო „ქართული ოცნების“ სრულიად შეგნებული პოლიტიკა.

რასაც ამბობს აზერბაიჯანის პრეზიდენტი, სიმართლეა, ნახეთ ზანგეზურის დერეფანი, ტრამპის მარშრუტი, ახლა კიდევ ალიევის განცხადება, ჩვენ ამ ყველაფრიდან ვართ ამოვარდნილი და არა იმიტომ, რომ ვინმემ ამოგვაგდო, არამედ იმიტომ, რომ ჩვენ თვითონ არ გვაქვს სურვილი. საქართველოს ამჟამინდელმა ფაქტობრივმა ხელისუფლებამ ყველაფერი გააკეთა იმისთვის, რომ ჩვენ აქედან ამოვვარდნილიყავით.

როდესაც ვკარგავთ გეოპოლიტიკურ ნიშას, მაშინ ჩვენ ძალიან ახლოს ვდგებით იმ მომენტთან, რაც გვქონდა მე-15 საუკუნეში. გეოპოლიტიკური ნიშნის დაკარგვა, ეს ნიშნავს იმას, რომ აღარ ვართ საინტერესო, ამას ჩვენ ძალიან ახლოს მივყავართ დამოუკიდებლობის დაკარგვასთან. ეს არის შეშფოთების საგანი“, - განაცხადა გია ჯაფარიძემ.

გია ჯაფარიძის თქმით, დავოსში „მშვიდობის საბჭოს“ შეხვედრაზე საქართველოს არ მიწვევა ნიშნავს, რომ საქართველომ თავისი ისტორიული ფუნქცია დაკარგა და იქცა რუსეთის სატელიტ სახელმწიფოდ.

„საქართველო რომ იქ არ არის მიწვეული, ეს სწორედ იმას ნიშნავს, რომ საქართველომ ის ფუნქცია დაკარგა, რა ფუნქციაც მას ისტორიის განმავლობაში ჰქონდა ან ყოველთვის ეძიებდა, რომ ჰქონოდა. საქართველო არის სხვა სახელმწიფოს სატელიტი სახელმწიფო, შესაბამისად რა "საჭიროა მისი მოწვევა?“, - განაცხადა გია ჯაფარიძემ.