აბუ დაბიში უკრაინას, აშშ-სა და რუსეთს შორის პირველი სამმხრივი შეხვედრა დასრულდა, შემდეგი შეხვედრა 24 იანვარს გაიმართება. ამის შესახებ უკრაინის ეროვნული უსაფრთხოებისა და თავდაცვის საბჭოს მდივანი, რუსტემ უმეროვი სოციალურ ქსელში წერს.

„აბუ დაბიში კირილ ბუდანოვთან, დავით არახამიასთან და სერგეი კისლიცასთან ერთად მონაწილეობა მივიღეთ სამმხრივ შეხვედრაში. ვაფასებთ ამერიკელების შუამდგომლობას. აშშ-ის მხრიდან კონსულტაციებში მონაწილეობა მიიღეს სპეციალურმა წარმომადგენელმა სტივ უიტკოფმა, ჯარედ კუშნერმა, ჯოშ გრუენბაუმმა, გენერალმა დენ დრისკოლმა და გენერალმა ალექს გრინკევიჩმა. რუსულ დელეგაციაში იყვნენ სამხედრო დაზვერვისა და არმიის წარმომადგენლები,” - წერს უმეროვი.

მან აღნიშნა, რომ შეხვედრაზე განხილული იყო რუსეთის ომის დასრულების პარამეტრები და მოლაპარაკების პროცესის შემდგომი ლოგიკა ღირსეული და ხანგრძლივი მშვიდობისკენ მიახლოების მიზნით.

„ხვალ კიდევ იქნება შეხვედრები. უკრაინულ დელეგაციას ხვალ შეუერთდებიან გენერალური შტაბის მეთაური ანდრეი გნატოვი და სამხედრო დაზვერვის ხელმძღვანელი მოადგილე გენერალი ვადიმ სკიბიცკი. ყოველი ეტაპის შედეგად ანგარიშს ვაბარებთ უკრაინის პრეზიდენტ ვოლოდიმირ ზელენსკის,” - წერს უმეროვი.

მისი თქმით, უკრაინული დელეგაცია ჰარმონიულად მოქმედებს იმ მიზნების ჩარჩოში, რომლებიც პრეზიდენტმა ზელენსკიმ დასახა.