ველი, რომ ირანის „ისლამური რევოლუციის გუშაგთა კორპუსს“ ტერორისტული ორგანიზაციების სიაში შევიყვანთ, - ამის შესახებ ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში, კაია კალასმა ბრიუსელში, ევროკავშირის საგარეო საქმეთა საბჭოს დაწყებამდე განაცხადა.

ევროკავშირის უმაღლესმა წარმომადგენელმა იმედი გამოთქვა, რომ დღევანდელ შეხვედრაზე საგარეო საქმეთა მინისტრები ირანის „ისლამური რევოლუციის გუშაგთა კორპუსის“ ტერორისტულ ორგანიზაციად გამოცხადების შესახებ შეთანხმდებიან.

„ირანის წინააღმდეგ ახალ სანქციებს ვაწესებთ და ასევე, ველი, რომ „ისლამური რევოლუციის გუშაგთა კორპუსს“ ტერორისტული ორგანიზაციების სიაში შევიყვანთ“, - განაცხადა კალასმა.

Politico-ს ცნობით, ირანის „ისლამური რევოლუციის გუშაგთა კორპუსის“ ტერორისტულ ორგანიზაციად გამოცხადებას რამდენიმე ქვეყანა ეწინააღმდეგება, თუმცა გუშინ, საფრანგეთმა განაცხადა, რომ „ისლამური რევოლუციის გუშაგთა კორპუსის“ ტერორისტული ორგანიზაციების სიაში დამატებას მხარს დაუჭერს.

„ჩვენს ევროპელ პარტნიორებთან ერთად ხვალ ბრიუსელში სანქციებს მივიღებთ მათ წინააღმდეგ, ვინც ირანში დარღვევებზეა პასუხისმგებელი. მათ აეკრძალებათ ევროპის ტერიტორიაზე შესვლა და მათი აქტივები გაიყინება. საფრანგეთი მხარს დაუჭერს ,,ისლამური რევოლუციის გუშაგთა კორპუსის” ევროკავშირის ტერორისტული ორგანიზაციების სიაში შეყვანას“, - აღნიშნა საფრანგეთის საგარეო საქმეთა მინისტრმა, ჟან-ნოელ ბარომ.