"ნუ გვართმევთ იდენტობას!" - ამ ლოზუნგით მოქალაქეები საქართველოს ტექნიკურ უნივერსიტეტთან შეიკრიბნენ.

აღნიშნულით ისინი თბილისის სახელმწიფო უნივერსიტეტისა და ტექნიკური უნივერსიტეტების გაერთიანების გადაწყვეტილებას აპროტესტებენ.

უნივერსიტეტთან შეკრებილ მოქალაქეებს, მათ შორის, თსუ-ს ლექტორებს გაშლილი აქვთ ბანერები წარწერით: „104 წლის უნივერსიტეტი არ იყიდება“, „სტუ მიქანაძის დაარსებული არ არის“.

შეგახსენებთ, საქართველოს განათლების, მეცნიერებისა და ახალგაზრდობის მინისტრის, გივი მიქანაძის განცხადებით, თბილისის სახელმწიფო უნივერსიტეტი და საქართველოს ტექნიკური უნივერსიტეტი გაერთიანდება. მისი თქმით, უნივერსიტეტების გაერთიანების მიზნით, მინისტრის ბრძანებით, შეიქმნება მართვის დროებითი ორგანო - საბჭო და დაინიშნება რექტორისა და რექტორის მოადგილეების მოვალეობის შემსრულებლები, რომლებიც წარმართავენ რეორგანიზაციის პროცესს.