რუსეთის პრეზიდენტი ვლადიმერ პუტინი ჩინეთის პრეზიდენტ სი ძინპინს ესაუბრა, - ინფორმაციას რუსული მედია ავრცელებს.

მათივე ცნობით, ვლადიმერ პუტინმა ვიდეოკონფერენციის ფორმატში გამართული საუბრის დროს ჩინეთის პრეზიდენტს განუცხადა, რომ ორ ქვეყანას შორის ურთიერთობა „სამაგალითოა“ და ეს ურთიერთობა „საერთაშორისო არასტაბილურობის ფონზე სტაბილიზაციის ფაქტორად რჩება“.

„ჩვენ მზად ვართ მჭიდრო კოორდინაცია გავაგრძელოთ გლობალურ და რეგიონულ საკითხებზე, როგორც ორმხრივად, ასევე მრავალმხრივ ფორუმებზე, კერძოდ, გაერო-ს, BRICS-ის, შანხაის თანამშრომლობის ორგანიზაციისა და სხვა ორგანიზაციების ფარგლებში, სადაც რუსეთ-ჩინეთის ტანდემი მნიშვნელოვან როლს ასრულებს“, - განაცხადა პუტინმა.

ჩინეთის პრეზიდენტმა, სი ძინპინმა ვლადიმერ პუტინთან საუბარში აღნიშნა, რომ ჩინეთმა და რუსეთმა სტრატეგიული თანამშრომლობა უნდა გააძლიერონ.

„ჩვენ მსოფლიო ანტიფაშისტურ ომში გამარჯვების მე-80 წლისთავი აღვნიშნეთ, რაც ჩვენი ქვეყნების მტკიცე გადაწყვეტილებას ადასტურებს, რომ მეორე მსოფლიო ომის შედეგები და საერთაშორისო სამართლიანობა დაიცვან“, - აღნიშნა სი ძინპინმა.