თბილისის საქალაქო სასამართლოში, 4 ოქტომბერს განვითარებულ მოვლენებთან დაკავშირებით ბრალდებულების, ზურაბ ჭავჭანიძის, ვლადიმერ გველესიანისა და კიდევ 12 პირის საქმის განხილვა მიმდინარეობს.

სხდომას მოსამართლე რომეო ტყეშელაშვილი განიხილავს. დღევანდელ პროცესს არ ესწრება ერთ-ერთი ბრალდებული, გიორგი ქორქია. მოსამართლის განმარტებით, წარმოდგენილი ოქმის თანახმად, სხდომაზე დასწრებაზე ბრალდებულმა უარი განაცხადა, თუმცა რის გამო, მიზეზს არ განმარტავს. ადვოკატის ინფორმაციით კი, გიორგი ქორქია სხდომას ჯანმრთელობის მდგომარეობიდან გამომდინარე არ ესწრება.

„როგორც ვიცი, ფეხი სტკიოდა, ასევე იტკივებდა ზურგს... ვერ გადაადგილდება ფიზიკურად“, - აღნიშნა ადვოკატმა.

დღევანდელ სხდომაზე ბრალდების მხარის მტკიცებულებებს იკვლევენ, კერძოდ, იკითხებიან მოწმეები.

შეგახსენებთ, ვლადიმერ გველესიანს, სერგო მეგრელიშვილს, ზურაბ ჭავჭანიძეს, გიორგი რურუას, ამირან დოლიშვილს, ანტონ ვარდანიძეს, გიორგი ქორქიას, ალექსანდრე ჩილაჩავას, გენადი კუპრეიშვილს, ლაშა ივანაძეს, ლევან ჯიქიას, სულხან ტუღუშს, ხვიჩა გოგოხიასა და რამაზ მამულაძეს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის ,,ა“ ქვეპუნქტით (სტრატეგიული და განსაკუთრებული მნიშვნელობის ობიექტის ხელში ჩაგდების მცდელობა, ჩადენილი ჯგუფურად) და 225-ე მუხლის მეორე ნაწილით (ჯგუფურ ძალადობაში მონაწილეობა) წარედგინათ, რაც სასჯელის სახედ და ზომად ექვს წლამდე თავისუფლების აღკვეთას ითვალისწინებს.