აშშ-ის პრეზიდენტის დონალდ ტრამპის განცხადებით, ონტარიოსა და მიჩიგანს შორის ახალი ხიდის გახსნას მანამ არ დაუშვებს, სანამ შეერთებული შტატები სრულ კომპენსაციას არ მიიღებს.

„როგორც ყველამ იცის, კანადა ათწლეულების განმავლობაში ძალიან უსამართლოდ ეპყრობოდა შეერთებულ შტატებს. ახლა კი, აშშ-სთვის ყველაფერი სწრაფად იცვლება! მაგრამ წარმოიდგინეთ, კანადა ონტარიოსა და მიჩიგანს შორის უზარმაზარ ხიდს აშენებს. ისინი ფლობენ როგორც კანადის, ასევე შეერთებული შტატების მხარეს და, რა თქმა უნდა, ააშენეს ის პრაქტიკულად ამერიკული კონტენტის გარეშე”, - წერს ტრამპი სოციალურ ქსელში.

მისი თქმით, აშშ-ის ყოფილმა პრეზიდენტმა ბარაკ ობამამ „სულელურად“ მისცა მათ შეღავათი, რომ გვერდი აუარონ ამერიკული პროდუქციის ყიდვას და არ გამოიყენონ არცერთი ამერიკული პროდუქტი, მათ შორის ფოლადი.

„ახლა კანადის მთავრობა ელის, რომ მე, როგორც შეერთებული შტატების პრეზიდენტი, მივცემ მათ უფლებას, უბრალოდ „ისარგებლონ ამერიკით!“ რას მიიღებს ამერიკის შეერთებული შტატები - აბსოლუტურად არაფერს! ონტარიო ამერიკულ სპირტიან სასმელებს, სასმელებს და სხვა ალკოჰოლურ პროდუქტებსაც კი არ განათავსებს თავის თაროებზე, მათ აბსოლუტურად ეკრძალებათ ამის გაკეთება და ახლა, ყველაფერთან ერთად, პრემიერ-მინისტრ კარნის სურს ჩინეთთან გარიგების დადება - რაც კანადას ცოცხლად შეჭამს. ჩვენ მხოლოდ ნარჩენებს მივიღებთ! მე ასე არ ვფიქრობ. პირველი, რასაც ჩინეთი გააკეთებს, არის კანადაში ჰოკეის ყველა თამაშის შეწყვეტა და სტენლის თასის სამუდამოდ გაუქმება. კანადის მიერ რძის პროდუქტებზე დაწესებული ტარიფები მრავალი წლის განმავლობაში მიუღებელი იყო, რაც ჩვენს ფერმერებს დიდ ფინანსურ რისკს უქმნის. არ დავუშვებ ამ ხიდის გახსნას მანამ, სანამ შეერთებული შტატები სრულად არ მიიღებს კომპენსაციას ყველაფრისთვის, რაც მათ მივეცით და ასევე, რაც მთავარია, სანამ კანადა შეერთებულ შტატებს სამართლიანად და პატივისცემით არ მოეპყრობა, რასაც ჩვენ ვიმსახურებთ“, - წერს ტრამპი.

მისი თქმით, აშშ დაუყოვნებლივ დაიწყებს მოლაპარაკებებს. ყველაფრის გათვალისწინებით, რაც მათ მივეცით, შესაძლოა, ამ აქტივის ნახევარი მაინც აშშ-ს ეკუთვნოდეს. „აშშ-ის ბაზრის შედეგად მიღებული შემოსავლები ასტრონომიული იქნება“, - წერს ტრამპი.