არგენტინაში შრომის რეფორმის საწინააღმდეგო აქციაზე შეტაკებები მოხდა, - ინფორმაციას Associated Press-ი ავრცელებს.

გამოცემის ცნობით, ბუენოს-აირესში კონგრესის შენობის წინ, სადაც სენატორები არგენტინის პრეზიდენტის, ხავიერ მილეის მიერ დაანონსებული შრომის კანონმდებლობის რეფორმის საკითხს განიხილავდნენ, პროფკავშირების ათასობით წევრი შეიკრიბა.

პოლიცია ბუენოს-აირესის ცენტრალურ მოედანზე კონტროლის შენარჩუნებას ცდილობდა, როდესაც შეტაკებები დაიწყო. დემონსტრანტებმა პოლიციელებს ე.წ. ბენზინის ბომბები, ქვები და წყლის ბოთლები ესროლეს, ხოლო სამართალდამცავებმა მათ წინააღმდეგ წყლის ჭავლი და რეზინის ტყვიები გამოიყენეს.

პოლიციამ ბუენოს-აირესში საპროტესტო აქციაზე, სულ მცირე, 15 ადამიანი დააკავა.

ცნობისთვის, არგენტინის პრეზიდენტმა ხავიერ მილეიმ კონგრესს შრომის რეფორმის კანონპროექტი 2025 წლის დეკემბერში წარუდგინა და იგი შრომის ბაზრის დერეგულაციას ითვალისწინებს. კანონპროექტი ბიზნესისთვის მუშების გათავისუფლებასა და ანაზღაურების შემცირებას ამარტივებს. ასევე, კანონპროექტი გაფიცვისა და შვებულების უფლებებზე შეზღუდვებს აწესებს.