ილიას სახელმწიფო უნივერსიტეტთან საპროტესტო აქცია მიმდინარეობს
ილიას სახელმწიფო უნივერსიტეტთან საპროტესტო აქცია მიმდინარეობს.
ილიაუნის სტუდენტები და პროფესორ-მასწავლებლები განათლების სამინისტროს მიერ სახელმწიფო უნივერსიტეტებში კვოტების განაწილებასთან დაკავშირებით მიღებულ გადაწყვეტილებებს აპროტესტებენ.
აქციის მონაწილეების განცხადებით, ხელისუფლების ნაბიჯი უნივერსიტეტის გაუქმებასა და სხვა სახელმწიფო უნივერსიტეტების დაზიანებას ნიშნავს.
ამასთან, აცხადებენ, რომ სტუდენტები მზად არიან პრემიერ-მინისტრ, ირაკლი კობახიძესთან და განათლებისა და მეცნიერების მინისტრთან საჯარო დისკუსიისთვის.
„დღეს „ქართულმა ოცნებამ“ გადადგა ყველაზე ანტიეროვნული ნაბიჯი – გააუქმა ილიას სახელმწიფო უნივერსიტეტი. დააზიანა არაერთი სახელმწიფო უნივერსიტეტი და შეურაცხყოფა მიაყენა ერთიანობისა და დამოუკიდებლობის სიმბოლოს – სოხუმის უნივერსიტეტს. ისინი ამბობენ, რომ განათლების ხარისხს აუმჯობესებენ, თუმცა როგორი ნაბიჯებით? თსუ და ილიას სახელმწიფო უნივერსიტეტი ორი ქართული უნივერსიტეტია, რომელიც ყველა საერთაშორისო რეიტინგში ფიგურირებს. ილიას უნივერსიტეტის დახურვა თურმე განათლების დონის გაუმჯობესებაა – ეს ალოგიკური განცხადებაა.
მობრძანდეს ირაკლი კობახიძე ნებისმიერ დროს, ნებისმიერ ფორმატში, ოღონდ პირდაპირ ეთერში. ჩვენ მზად ვართ დავსხდეთ ირაკლი კობახიძესთან. მზად ვართ დავუჯდეთ ე.წ. განათლების მინისტრს. ჩვენ ძალიან ბევრი მწვავე კითხვა გვაქვს, რომელზეც არცერთს არ ექნება პასუხები”, - განაცხადა ილიას სახელმწიფო უნივერსიტეტის სტუდენტმა, ალექსანდრე რიგვავამ.
სტუდენტი ალექსანდრე რიგვავა ამბობს, რომ პროტესტი გაგრძელდება და უკან დახევას არ აპირებენ.
“ჩვენ არ ვაპირებთ უკან დახევას. ეს არის ჩვენი იდენტობა. ეს არის უნივერსიტეტი, რომელმაც ძალიან ბევრი რამ გვასწავლა და არ ვაპირებთ დათმობას. ვაპირებთ გამოვიყენოთ ბრძოლის ნებისმიერი ხერხი, რათა დავიცვათ ჩვენი უნივერსიტეტი, ქართული განათლების სისტემა და დავიცვათ ეროვნული ინტერესებს”, - განაცხადა ილიას სახელმწიფო უნივერსიტეტის სტუდენტმა, ალექსანდრე რიგვავამ.
