უკრაინის თავდაცვის საკითხებზე საკონტაქტო ჯგუფის შეხვედრის დროს მოკავშირეებმა ქვეყანას 35 მილიარდი აშშ დოლარის ოდენობის სამხედრო დახმარება აღუთქვეს, - ამის შესახებ გაერთიანებული სამეფოს თავდაცვის მინისტრმა ჯონ ჰილიმ ბრიუსელში საკონტაქტო ჯგუფის შეხვედრის შემდეგ გამართულ პრესკონფერენციაზე განაცხადა.

მისი თქმით, საკონტაქტო ჯგუფის მისია უცვლელი რჩება - მხარი დაუჭიროს უკრაინას დღევანდელ ბრძოლაში და ხელი შეუწყოს მშვიდობის უზრუნველყოფას ხვალ.

„შემიძლია დავადასტურო, რომ დღეს უკრაინის თავდაცვის საკონტაქტო ჯგუფი უკრაინას 35 მილიარდი დოლარის ახალ სამხედრო დახმარებას გამოუყოფს“, - აღნიშნა თავდაცვის მინისტრმა.

მისი თქმით, შეხვედრამ პუტინს ძალიან მკაფიო სიგნალი გაუგზავნა.

„ასეთი ერთიანი და მტკიცე არასდროს ვყოფილვართ. გავზრდით სამხედრო დახმარებას უკრაინისთვის, გავზრდით ზეწოლას რუსეთზე და გვსურს, რომ 2026 წელი იყოს ამ ომის დასრულების წელი, წელი, როდესაც მშვიდობას მივაღწევთ“, - აღნიშნა ჰილიმ.