4 ოქტომბერს, ათონელის სასახლესთან განვითარებულ მოვლენებთან დაკავშირებით ბრალდებულების ნაწილს შესაძლოა, საპროცესო შეთანხმება გაუფორმდეთ.

როგორც ერთ-ერთი დაკავებულის, დავით სტურუას ადვოკატი, მარიამ ჩხეიძე აცხადებს, მას კოლეგებისგან აქვს ინფორმაცია, რომ რამდენიმე ბრალდებულის ადვოკატს დაუკავშირდნენ და საპროცესო შეთანხმება შესთავაზეს.

ჩხეიძის ინფორმაციით, საუბარია, 1 წელი პირობით და 1 წელი რეალურ სასჯელზე.

იქიდან გამომდინარე, რომ საპროცესო შეთანხმების აუცილებელი პირობა ბრალის აღიარებაა, ადვოკატების ნაწილი აცხადებს, რომ შეთავაზების შემთხვევაში ისინი არ დათანხმდებიან, ვინაიდან მიიჩნევენ, რომ დაკავებულებს დანაშაული არ ჩაუდენიათ.

არსებული ინფორმაციით, პროკურატურა საპროცესო შეთანხმებას ისეთ ბრალდებულებს სთავაზობს, რომელთა ქმედებებითაც სამართალდამცავი ორგანოს წარმომადგენლებს დაზიანებები არ მიუღიათ.

თბილისის საქალაქო სასამართლოში 4 ოქტომბრის მოვლენებთან დაკავშირებით ბრალდებულების - გიორგი ჩახუნაშვილის, ია დარახველიძის, ევა შაშიაშვილისა და კიდევ 12 პირის სასამართლო პროცესი რამდენიმე წუთში დაიწყება.

ცნობისთვის, 4 ოქტომბერს განვითარებულ მოვლენებთან დაკავშირებით დაკავებულ გოჩა ყატაშვილს, სულხან აბრალავას, კონსტანტინე კოკაიას, დავით ჟღენტს, კახაბერ მჟავანაძეს, ალექსანდრე გოგოლაძეს, დავით სტურუას, ევა შაშიაშვილს, ზაქრო ალბუთაშვილს, გენადი კელიხაშვილს, დათო ღუწკაიას, რამაზ ჯორბენაძეს, ჯანდრი თირქიას, გიორგი ჩახუნაშვილსა და ია დარახველიძეს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის “ა“ ქვეპუნქტით წარედგინათ, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს ჩადენილს ჯგუფურად. მათ ბრალდება სსსკ-ის 225-ე მუხლის მეორე ნაწილით აქვს წარდგენილი, რაც ჯგუფურ ძალადობაში მონაწილეობას გულისხმობს.

ია დარახველიძე, გიორგი ჩახუნაშვილი და ევა შაშიაშვილი გირაოს სანაცვლოდ თავისუფლებაში იმყოფებიან.