აშშ-სა და ირანს შორის მოლაპარაკებების მორიგი რაუნდი ჟენევაში გაიმართება, - ინფორმაციას Reuters-ი წყაროზე დაყრდნობით ავრცელებს.

გამოცემის ცნობით, აშშ-ის პრეზიდენტის წარმომადგენლები, სტივ უიტკოფი და ჯარედ კუშნერი ირანის დელეგაციასთან ბირთვული შეთანხმების შესახებ მოლაპარაკებებს სამშაბათს, 17 თებერვალს ჟენევაში გამართავენ.

ჟენევაში აშშ-სა და ირანს შორის მოლაპარაკებების მორიგი რაუნდი ომანის შუამავლობით შედგება.

გამოცემას წყარომ განუცხადა, რომ ირანის დელეგაციასთან შეხვედრის შემდეგ უიტკოფი და კუშნერი აშშ-ის, უკრაინისა და რუსეთის წარმომადგენლებს შორის დაგეგმილ სამმხრივ მოლაპარაკებებში მიიღებენ მონაწილეობას, რომელიც ჟენევაში იმავე დღეს გაიმართება.