ლევან დავითაშვილი ირაკლი ღარიბაშვილის დროინდელი თანამდებობის პირია, ასე რომ, არ არის გამორიცხული უკავშირდებოდეს ღარიბაშვილი-ლილუაშვილის კლანის წინააღმდეგ ბრძოლას, - ამის შესახებ პარტია „გახარია-საქართველოსთვის“ ერთ-ერთმა ლიდერმა გიორგი შარაშიძემ ყოფილი ვიცე-პრემიერის, ლევან დავითაშვილის სუს-ში გამოკითხვაზე დაბარების საკითხის კომენტირებისას განაცხადა.

როგორც მან „პალიტრანიუსის“ გადაცემაში „პოლიტიკური სივრცე“ აღნიშნა, იკვეთება ორი შესაძლო ვერსია - პოლიტიკური ანგარიშსწორების გაგრძელება ან პროპაგანდისტული დღის წესრიგის ფორმირება.

„კომიკური ხდება სუს-ის გამოძიებების სერია. დიდი ალბათობით, ისევ პროპაგანდას ემსახურება. ისევ, რაღაც ჩანაფიქრია. ბოლო პერიოდში „ოცნებამ“ აქტიურად დაიწყო საუბარი ევროპასთან დაკავშირებადობის თემასთან, რომ ხედავენ როგორ იცვლება სიტუაცია რეგიონში, რამდენად წინ არის სომხეთი-აზერბაიჯანი, შეიძლება რაღაც ტიპის გათვლა აქვთ. ხალხს აჩვენონ, როგორ სურთ ევროპასთან ეკონომიკური ურთიერთობა ან პირიქით საქართველომ რაღაც როლი წარმოაჩინოს და ძალიან არ დაიჩრდილოს იმ პროგრესის ფონზე, რაც აქვთ ჩვენს მეზობელ ქვეყნებს.

ეს გამოძიება ერთი მხრივ, ემსახურება შიდა პოლიტიკურ გარჩევებს. სიმართლე გითხრათ, ჩემთვისაც გასაკვირი იყო ლევან დავითაშვილის სუს-ში გამოკითხვაზე დაბარება. დავითაშვილი ირაკლი ღარიბაშვილის დროინდელი თანამდებობის პირია, მათ შორის, ვიცე-პრემიერი იყო, ეკონომიკის მინისტრი იყო, ასე რომ არ არის გამორიცხული უკავშირდებოდეს ღარიბაშვილი-ლილუაშვილის კლანის წინააღმდეგ ბრძოლას, რადგან არავინ დატოვეს თუკი ვინმე ამ ფლანგზე იყო. ყველას მიმართ, როგორც მინიმუმ, კითხვები ისმის. ერთი ვერსიაა პოლიტიკური ანგარიშსწორების ხაზის გაგრძელება და მეორე ვერსიაა პროპაგანდისტული ხაზის ჩამოყალიბება“,- განაცხადა შარაშიძემ.

შარაშიძემ ასევე ისაუბრა მიხეილ ყაველაშვილის პარლამენტში მოხსენებაზე.

შარაშიძემ განაცხადა, რომ მიხეილ ყაველაშვილი დამოუკიდებლად არ ქმნის დღის წესრიგს და მისი გამოსვლის ტექსტი მმართველი გუნდის პარტიულ ოფისშია მომზადებული.

„ყველამ კარგად იცის, რომ ყაველაშვილი არც დღის წესრიგს ქმნის, არც დამოუკიდებლად იღებს გადაწყვეტილებას, არც ამ ტექსტის მომზადებაში მონაწილეობა ექნებოდა მიღებული. რა თქმა უნდა, გამოსვლის ტექსტი დაწერილია „ოცნების“ პარტიულ ოფისში და მისთვის მიწოდებული. უნდა ითქვას, რომ ტექსტის წაკითხვის უნარები გაუმჯობესებული აქვს. პროგრესი იგრძნობოდა. ჩვენთვის არ იყო საინტერესო თემა. ის დრო, რაც ჩვენი ფრაქციის თავმჯდომარეს ეკუთვნოდა ჩვენ არ გამოვიყენეთ. ჩვენთვის მთავარი იყო რამდენიმე რამის გაჟღერება და გახმოვანება. პირველი ის, რომ მიხეილ ყაველაშვილი არის ივანიშვილის პრეზიდენტი“,- განაცხადა შარაშიძემ.