სრული აბსურდი იქნება საქართველოში ბიოლოგიური და ეკოლოგიური მეცნიერების განახევრება, რომელსაც შეიძლება მოჰყვეს ამ მიმართულებების დახურვა ილიას უნივერსიტეტში, - ამის შესახებ ილიას სახელმწიფო უნივერსიტეტის პროფესორმა, დავით თარხნიშვილმა უნივერსიტეტთან ჟურნალისტებს განუცხადა.

მისი თქმით, ილიას უნივერსიტეტს უდიდესი წვლილი მიუძღვის ამ სფეროს განვითარებაში.

„დღეს მეცნიერება არის ტექნიკურად რთული. მას სჭირდება ლაბორატორიული კვლევების მოდელირების, სტატისტიკური დამუშავების, ბიოინფორმატიკის და სხვა რთული მიმართულებების განვითარება. მხოლოდ ამ ერთ უნივერსიტეტში შეყრა ამ მიმართულებების, არის იმის წინაპირობა, რომ ხარისხიანი და მოწინავე მეცნიერება განვითარდეს ჩვენთან. დღეს მე შემიძლია სრული პასუხისმგებლობით ვთქვა, რომ ცენტრალურ ევროპაში ძალიან ღირსეული ადგილი გვიჭირავს. კავკასიაში უბრალოდ არ არის ისეთი სხვა ინსტიტუტი, რომელიც ამ სფეროებში ჩვენთან შედარებადი იქნება. ფაქტობრივად, სრული აბსურდი იქნება საქართველოში ბიოლოგიური და ეკოლოგიური მეცნიერების განახევრება, რომელიც შეიძლება მოჰყვეს ამ მიმართულებების დახურვას ილიას უნივერსიტეტში“,-განაცხადა დავით თარხნიშვილმა.

მისი განმარტებით, ამ ახალი ცოდნის შესწავლაში გადამწყვეტი წვლილი აქვთ არა მხოლოდ უნივერსიტეტის პროფესორებსა და მეცნიერებს, არამედ სტუდენტებს.

„20 წელია ჩვენი პროგრამები, მიმართულებები ეკოლოგიისა და ბიოლოგიის სფეროებში ემსახურება საქართველოს. ჩვენ ვეხმარებით საქართველოს და ქართულ სახელმწიფოს იმ ინფორმაციაში, რომელიც არის აუცილებელი ცოცხალი სამყაროს შესასწავლად და ვქმნით ახალ ცოდნას, რაც არის ძალიან მნიშვნელოვანი. ამ 20 წელიწადში 5-ჯერ გაიზარდა საქართველოში გამოქვეყნებული სამეცნიერო ინფორმაცია ეკოლოგიის და ბიოლოგიური მეცნიერების სფეროში, სადაც ილიას უნივერსიტეტის წვლილი არის დაახლოებით ნახევარი. რომ ავიღოთ ცალკეული მიმართულებები: ეკოლოგია, ტყის მეცნიერება, კონსერვაციული ბიოლოგია, აქ ილიას უნივერსიტეტის წვლილი 70%-ს აღემატება. ამ დროის განმავლობაში 2-ჯერ გაიზარდა ჩვენი წვლილი მსოფლიო დონეზე. ეს ყველაფერი განვითარდა სწორედ ილიას სახელმწიფო უნივერსიტეტში“,- განაცხადა დავით თარხნიშვილმა.