მარცხენა მუხლის სახსარში მეტალი მომხვდა, ჩემი ვარაუდით, სასახლის ჯებირის ნაწილი. უშუალოდ, კონკრეტული პიროვნება არ დამინახავს, ვინ მესროლა, - ამის შესახებ 4 ოქტომბრის საქმეზე ჩვენების მიცემისას პატრულ-ინსპექტორმა ნინო ჯიოშვილმა განაცხადა.

მას საქმეში დაზარალებულის სტატუსი აქვს.

„აქციის მონაწილეები დედას გვაგინებდნენ, სიტყვიერ შეურაცხყოფას გვაყენებდნენ, „რუსის მონას" გვეძახდნენ, სხვადასხვა ნივთს გვესროდნენ, რა დროსაც დაზიანება მივიღე, სასწრაფო დახმარების ბრიგადამ კლინიკაში გადამიყვანა, გამეწია დახმარება და იმავე დღეს გავეწერე ბინაზე.

მარცხენა მუხლის სახსარში მეტალი მომხვდა, ჩემი ვარაუდით, ჯებირის ნაწილი. უშუალოდ, კონკრეტული პიროვნება არ დამინახავს, ვინ მესროლა. იმდენად არეული სიტუაცია იყო, კონკრეტულად ვინ მესროლა ნივთი არ ვიცი, „წიწაკის სპრეი“ ისევე როგორც სხვებზე, ჩემზეც მოქმედებდა და ხედვა დაფარული იყო“, - განაცხადა ჯიოშვილმა.

ადვოკატ გაგი მოსიაშვილის კითხვაზე, დაზიანდნენ თუ არა აქციის მონაწილეებიც, პოლიციელმა უპასუხა, რომ „არ იცის და ალბათ, დაზიანდნენ“.

კიდევ ერთ კითხვაზე, გაიგონა თუ არა, რომ პოლიციელები აქციის მონაწილეებს აგინებდნენ, მოწმემ უპასუხა, რომ „არ გაუგონია“.

ცნობისთვის, ვლადიმერ გველესიანს, სერგო მეგრელიშვილს, ზურაბ ჭავჭანიძეს, გიორგი რურუას, ამირან დოლიშვილს, ანტონ ვარდანიძეს, გიორგი ქორქიას, ალექსანდრე ჩილაჩავას, გენადი კუპრეიშვილს, ლაშა ივანაძეს, ლევან ჯიქიას, სულხან ტუღუშს, ხვიჩა გოგოხიასა და რამაზ მამულაძეს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის ,,ა“ ქვეპუნქტით (სტრატეგიული და განსაკუთრებული მნიშვნელობის ობიექტის ხელში ჩაგდების მცდელობა, ჩადენილი ჯგუფურად) და 225-ე მუხლის მეორე ნაწილით (ჯგუფურ ძალადობაში მონაწილეობა) წარედგინათ, რაც სასჯელის სახედ და ზომად ექვს წლამდე თავისუფლების აღკვეთას ითვალისწინებს.