უნგრეთს არ სძულს უკრაინა, მაგრამ პრობლემა ისაა, რომ უკრაინის სახელმწიფოს სძულს უნგრეთი და უკრაინის სახელმწიფო ბოლო ათი წლის განმავლობაში ანტიუნგრულ პოლიტიკურ მიდგომას ახორციელებს, - ამის შესახებ უნგრეთის საგარეო საქმეთა მინისტრმა პიტერ სიიარტომ ბრიუსელში ჟურნალისტებს განუცხადა.

„უკრაინა უნგრეთის მიმართ ძალიან მტრულად იქცევა. გთხოვთ, ჰკითხოთ უკრაინელებს, რატომ შეწყვიტეს უნგრეთისთვის ნავთობის მიწოდება, რატომ დააყენეს რისკის ქვეშ უნგრეთის ენერგომომარაგების უსაფრთხოება, რატომ არ დაუბრუნეს უფლებები უნგრეთის ეროვნულ თემს? და ძალიან მაინტერესებს, რა იქნება მათი პასუხი“, - აღნიშნა სიიარტომ.

მისი მტკიცებით, ევროკომისია იქცევა როგორც „უკრაინის კომისია“ და უკრაინის ინტერესებს უნგრეთზე წინ აყენებს.

სიიარტოს თქმით, სანქციებისა და სესხის შეჩერების შესახებ გადაწყვეტილება უნგრეთმა იმის გამო მიიღო, რომ უკრაინამ გადაწყვიტა, არ განაახლოს ნავთობის მიწოდება უნგრეთისთვის, რაც საფრთხეს უქმნის ქვეყნის ენერგეტიკულ უსაფრთხოებას.

„ეს არის და ეს. არავის აქვს უფლება, საფრთხე შეუქმნას ჩვენს ენერგეტიკულ უსაფრთხოებას, რადგან ეს ეროვნული სუვერენიტეტის საკითხია. ასე რომ, ბურთი უკრაინის მოედანზეა, როდის განაახლებენ უნგრეთისთვის ნავთობის მიწოდებას. სანამ ეს არ მოხდება, უნგრეთის პოზიციაში ცვლილება არ იქნება“, - აღნიშნა სიიარტომ.