ე.წ. საბოტაჟის საქმის მოსამართლე თამარ მახარობლიძემ მისი აცილების თაობაზე დაცვის მხარის შუამდგომლობა არ დააკმაყოფილა.

მახარობლიძის განმარტებით, შუამდგომლობა შესაბამისი გარემოებების არ არსებობის გამო არ დაკმაყოფილდა.

მოსამართლემ დაადასტურა, რომ დაცვის მხარის მიერ დასახელებული განცხადებები მას ეკუთვნოდა, „რადგან მაშინ მოსაზრებების დაფიქსირებისგან შეზღუდული არ იყო, განსხვავებით დღევანდელი მდგომარეობისა“.

აღნიშნულის შემდეგ მოსამართლეს ნიკა გვარამიამ კითხვით მიმართა, „დღესაც ასე ფიქრობს თუ არა მასზე, როგორც ადრე და აქვს თუ არა იგივე დამოკიდებულება“, რაზეც მახარობლიძემ მას უპასუხა, რომ „მოსამართლეს კითხვებს ნუ უსვამდა“.

რაც შეეხება ბრალდების მხარეს, პროკურორ ლაშა კოტრიკაძის განცხადებით, „თამარ მახარობლიძეს როგორც მოქალაქეს და სამართლის ექსპერტს ისე ჰქონდა ნიკა გვარამიას საქმეზე შეფასება დაფიქსირებული და ხელისუფლების ქმედება დადებით კონტექსტში შეფასებული“.

პროკურორის თქმით, მას არ აქვს მტკიცებულება, რომ მოსამართლე საქმეზე გადაწყვეტილებას საქმიდან გამომდინარე არ მიიღებს.

სხდომის გაგრძელებისას მოსამართლე ბრალდებულების ვინაობის დადგენაზე გადავიდა, რა დროსაც მიხეილ სააკაშვილს მიმართა კითხვით, ეთქვა მისი სახელი და გვარი.

აღნიშნულს დარბაზიდან გიორგი ბარამიძის რეპლიკა მოჰყვა, თუ როგორ ეკითხებოდა ის სააკაშვილს ვინაობას.

„ერთი ყაველაშვილია პრეზიდენტი და მეორე თქვენ ხართ მოსამართლე. ვის ეკითხები სახელს და გვარს?“, - განაცხადა ბარამიძემ.

მას მანდატურის თანამშრომლებმა სხდომათა დარბაზი დაატოვებინეს.

ცნობისთვის, ე.წ. საბოტაჟის საქმეზე გენერალურმა პროკურატურამ მიხეილ სააკაშვილს, გიორგი ვაშაძეს, ნიკა გვარამიას, ნიკა მელიას, ზურაბ გირჩი ჯაფარიძეს, ელენე ხოშტარიას, მამუკა ხაზარაძესა და ბადრი ჯაფარიძეს ბრალდება წარუდგინა.

უფრო კონკრეტულად, გიორგი ვაშაძეს და ზურაბ გირჩი ჯაფარიძეს ბრალი სისხლის სამართლის კოდექსის 318-ე მუხლის პირველი ნაწილით და 319-ე მუხლით წარედგინათ, რაც საბოტაჟს და უცხო ქვეყნისათვის მტრულ საქმიანობაში დახმარებას გულისხმობს. აღნიშნული სასჯელის სახედ და ზომად 7-დან 15- წლამდე თავისუფლების აღკვეთას გულისხმობს.

ელენე ხოშტარიას ბრალდება საქართველოს სისხლის სამართლის კოდექსის 318-ე მუხლის პირველი ნაწილით, 319-ე მუხლით და 321-ე პრიმა მუხლის პირველი ნაწილით წარედგინა, რაც საბოტაჟის, აღნიშნული დანაშაულისთვის მატერიალური რესურსების მიწოდებას და უცხო ქვეყნისათვის მტრულ საქმიანობაში დახმარებას გულისხმობს.

ნიკა გვარამიას, ნიკა მელიას, მამუკა ხაზარაძეს და ბადრი ჯაფარიძეს ბრალდება საქართველოს სისხლის სამართლის კოდექსის 318-ე მუხლის პირველი ნაწილით წარედგინათ, რაც საბოტაჟს გულისხმობს.

მიხეილ სააკაშვილს ბრალდება სისხლის სამართლის კოდექსის 317-ე მუხლით აქვს წარდგენილი, რაც საქართველოს კონსტიტუციური წყობილების ძალადობით შეცვლისაკენ ან სახელმწიფო ხელისუფლების დამხობისაკენ მოწოდებას გულისხმობს.

აღნიშნულ საქმეში გიორგი ვაშაძეს და ზურაბ გირჩი ჯაფარიძეს აღკვეთის ღონისძიების სახით 30 000-ლარიანი, მამუკა ხაზარაძესა და ბადრი ჯაფარიძეს კი 1 მილიონი ლარი გირაო აქვთ შეფარდებული.