სლოვაკეთი უკრაინისთვის ელექტროენერგიის მიწოდებას აჩერებს, - ამის შესახებ სლოვაკეთის პრემიერ-მინისტრმა, რობერტ ფიცომ განაცხადა.

„შევასრულე ის, რაც შაბათს გამოვაცხადე, რომ თუ ორშაბათამდე ნავთობის მიწოდება არ განახლდებოდა, სახელმწიფო კომპანია SEPS-ს (სლოვაკეთის ელექტროქსელის სისტემის ოპერატორი) ვთხოვდი, უკრაინისთვის ელექტროენერგიის საგანგებო რეჟიმში მიწოდება შეეჩერებინა“, - განაცხადა რობერტ ფიცომ.

მისი თქმით, თუ უკრაინა სლოვაკეთისთვის ნავთობის მიწოდებას „დრუჟბას“ ნავთობსადენით არ განაახლებს, მაშინ „სლოვაკეთი უკრაინას ენერგოსისტემის სტაბილიზაციაში არ დაეხმარება“.

„სლოვაკეთს უფლება აქვს ნავთობი მიიღოს. ჩვენ შემდგომი ნაბიჯების გადადგმის უფლებას ვიტოვებთ“, - აღნიშნა სლოვაკეთის პრემიერ-მინისტრმა.

ცნობისთვის, სლოვაკეთსა და უნგრეთს ნავთობი უკრაინის გავლით „დრუჟბას“ ნავთობსადენით 27 იანვრის შემდეგ აღარ მიეწოდებათ. უკრაინის განცხადებით, ამის მიზეზი ნავთობსადენზე რუსეთის თავდასხმაა, ხოლო სლოვაკეთი და უნგრეთი უკრაინას ნავთობის მიწოდების განზრახ შეჩერებაში ადანაშაულებენ.